१४ वर्षे पोलिसांना गुंगारा, अखेर ढाब्यावरून मुसक्या आवळल्या! पाचोड पोलिसांची धडाकेबाज कारवाई

छत्रपती संभाजीनगर (औरंगाबाद) दि २९ :- मोटारसायकल चोरीच्या गुन्ह्यात तब्बल १४ वर्षांपासून फरार असलेल्या आरोपीला अखेर पकडण्यात पाचोड पोलिसांना यश आले आहे. सोनेसिंग प्रेमसिंग टाक असे अटक करण्यात आलेल्या आरोपीचे नाव असून, तो जालना येथील शिवाजी चौक परिसरातील रहिवासी आहे. परतूर भागात ‘सैराट २’ नावाने ढाबा सुरू करून तो राहत असल्याची माहिती मिळाल्यानंतर पोलिसांनी साध्या वेशात छापा टाकून त्याला ताब्यात घेतले.

नेमके प्रकरण काय?

पाचोड पोलीस ठाण्यात सन २०१२ मध्ये डॉ. ठोके यांनी मोटारसायकल चोरीप्रकरणी तक्रार दाखल केली होती. या गुन्ह्यातील दोन आरोपींना यापूर्वीच अटक करण्यात आली होती. मात्र, सोनेसिंग टाक हा गुन्हा घडल्यापासून फरार होता. पोलिसांनी अनेकदा त्याचा शोध घेतला, परंतु तो हाती लागत नव्हता. आपले अस्तित्व बदलून तो राहत असल्याने त्याचा शोध घेणे पोलिसांसमोर आव्हान ठरले होते.

वरिष्ठांच्या सूचनेनंतर शोधमोहीम तीव्र

२६ ऑक्टोबर २०२६ रोजी विशेष पोलीस महानिरीक्षक वीरेंद्र मिश्रा यांनी गुन्हे आढावा बैठकीत फरार आरोपींचा शोध घेण्याबाबत सक्त सूचना दिल्या होत्या. त्यानुसार छत्रपती संभाजीनगरचे पोलीस अधीक्षक प्रकाश जाधव आणि अपर पोलीस अधीक्षक प्रशांत स्वामी यांनी फरार आरोपीला अटक करण्यासाठी विशेष पथक नेमून कारवाई करण्याच्या सूचना दिल्या.

पाचोड पोलीस ठाण्याचे प्रभारी अधिकारी सहायक पोलीस निरीक्षक सचिन पंडित यांनी एक पथक जालना येथे रवाना केले. पथकाने सलग दोन दिवस परिसरात मुक्काम करून आरोपीचा शोध घेतला.

गोपनीय माहितीने लागला सुगावा

या शोधमोहीमेदरम्यान गोपनीय अंमलदार संदीप जाधव यांना आरोपी सुमारे दहा वर्षांपूर्वी कामानिमित्त परतूर भागात गेल्याची माहिती मिळाली. पुढील तपासात त्याने परतूर परिसरात ‘सैराट २’ नावाने ढाबा सुरू केल्याचे समोर आले.

मिळालेल्या माहितीच्या आधारे गोपनीय अंमलदार संदीप जाधव, मनोज वैद्य आणि होमगार्ड गोविंद शेळके यांनी आरोपीचा शोध घेतला. त्यानंतर संबंधित ढाब्यावर साध्या वेशात छापा टाकण्यात आला. या कारवाईत सोनेसिंग टाक पोलिसांच्या हाती लागला. त्याला पाचोड पोलीस ठाण्यात आणण्यात आले असून, त्याच्याविरुद्ध पुढील कायदेशीर कार्यवाही सुरू आहे.

वरिष्ठांच्या मार्गदर्शनाखाली यशस्वी कारवाई

ही कारवाई पोलीस अधीक्षक प्रकाश जाधव, अपर पोलीस अधीक्षक प्रशांत स्वामी आणि पैठण उपविभागाचे उपविभागीय पोलीस अधिकारी सुनील पाटील यांच्या मार्गदर्शनाखाली करण्यात आली. सहायक पोलीस निरीक्षक सचिन पंडित, गोपनीय अंमलदार संदीप जाधव, मनोज वैद्य आणि होमगार्ड गोविंद शेळके यांनी या मोहिमेत सहभाग घेतला.

१४ वर्षांपासून फरार असलेल्या आरोपीला शोधून काढण्यात पाचोड पोलिसांना मिळालेले हे यश पोलिसांच्या नियोजनबद्ध तपासाचे महत्त्व अधोरेखित करणारे ठरले आहे.

महाराष्ट्र वाणी | सत्यासाठी निर्भीड, जनतेसाठी समर्पित