🚨 लाडकी बहीण योजनेत मोठी छाननी; अपात्र लाभार्थींवर कारवाईची शक्यता, प्रशासनाचा इशारा!

May 31, 2026 - 11:42

🚨 लाडकी बहीण योजनेत मोठी छाननी; अपात्र लाभार्थींवर कारवाईची शक्यता, प्रशासनाचा इशारा!

महाराष्ट्र वाणी

मुंबई दि ३१ :- मुख्यमंत्री माझी लाडकी बहीण योजनेबाबत महत्त्वाची घडामोड समोर आली आहे. योजनेचा लाभ नियमबाह्य पद्धतीने घेतल्याचा संशय असलेल्या महिलांची आता सखोल चौकशी करण्यात येणार असल्याचे संकेत प्रशासनाकडून देण्यात आले आहेत. पात्रतेचे निकष पूर्ण न करता लाभ घेतलेल्या महिलांवर कारवाई होण्याची शक्यता वर्तवली जात आहे.

प्रशासकीय अधिकाऱ्यांकडून अशा लाभार्थी महिलांची माहिती तपासली जाणार आहे. अर्ज करताना दिलेली माहिती, लाभ घेण्याचा कालावधी तसेच पात्रतेशी संबंधित कागदपत्रांची पडताळणी केली जाणार असल्याचे सांगितले जात आहे. या प्रक्रियेला नंदुरबार जिल्ह्यात सुरुवात झाली असून, तेथे संशयित आणि अपात्र लाभार्थ्यांची संख्या लक्षणीय असल्याचे निदर्शनास आले आहे.

नंदुरबार जिल्ह्यात या योजनेसाठी सुमारे ४ लाख ३४ हजार महिलांनी अर्ज केले होते. त्यापैकी ४ लाख २२ हजार ७५८ महिलांना पात्र ठरवण्यात आले, तर ११ हजार ७२२ अर्ज विविध कारणांमुळे अपात्र घोषित करण्यात आले होते.

आता अपात्र ठरलेल्या अर्जांची पुन्हा एकदा सविस्तर तपासणी केली जाणार आहे. लाभार्थी म्हणून नोंद असलेल्या महिलांची माहिती आणि कागदपत्रे प्रत्यक्ष पडताळून पाहण्याचे काम प्रशासनाकडून सुरू करण्यात येणार आहे.

दरम्यान, योजनेसाठी ई-केवायसी प्रक्रिया अनिवार्य करण्यात आली होती. शासनाने यासाठी वेळोवेळी मुदतवाढ दिल्यानंतर ३० एप्रिल २०२६ ही अंतिम मुदत निश्चित केली होती. काही महिलांनी ई-केवायसी पूर्ण करूनही त्यांच्या खात्यात हप्ते जमा झाले नसल्याची तक्रार केली आहे. संबंधित महिलांनी आता थकीत हप्ते देण्याची मागणी प्रशासनाकडे केली आहे.

वाचत राहा महाराष्ट्र वाणी — आपल्या हक्काच्या योजनांशी संबंधित प्रत्येक महत्त्वाची अपडेट सर्वप्रथम!