गुंगीकारक गोळ्यांची अवैध विक्री करणारा इसम जेरबंद — स्थानिक गुन्हे शाखेची धडक कारवाई!

महाराष्ट्र वाणी न्युज 

छत्रपती संभाजीनगर(औरंगाबाद), दि. ३० :-  

शहरातील चिकलठाणा परिसरात गुंगीकारक औषधी गोळ्यांची अवैधरित्या विक्री करणाऱ्या इसमाला स्थानिक गुन्हे शाखेच्या पथकाने सापळा रचून जेरबंद केले. या कारवाईत Alprazolam Tablets L.P. 0.5 mg अशा ४८ स्ट्रीप (४८० गोळ्या) किंमत अंदाजे ₹४८,००० चा मुद्देमाल जप्त करण्यात आला.

स्थानीय गुन्हे शाखेचे पोलीस निरीक्षक विजयसिंह राजपूत यांना मिळालेल्या गोपनीय माहितीनुसार, मौजे गेवराई शिवारातील आलाना कंपनीसमोरील वस्तीमध्ये एक इसम नशा करण्यासाठी या गोळ्यांची विक्री करत असल्याचे समजले. त्यानुसार रात्री उशीरा सापळा रचून छापा टाकण्यात आला. या कारवाईत आरोपी बालासिंग करमसिंग टाक (वय 48, रा. ब्रुक बॉन्ड आलाना गेवराई) यास ताब्यात घेण्यात आले.

तपासात आरोपीकडे औषधी साठ्याचा परवाना, खरेदी बिल वा डॉक्टरांचे प्रिस्क्रिप्शन नसल्याचे स्पष्ट झाले. या गोळ्यांचा नशा करण्यासाठी वापर होत असल्याची जाणीव असूनही आरोपीने तो साठा बेकायदेशीरपणे जवळ ठेवला होता. त्याच्याविरुद्ध NDPS अधिनियम 1985 तसेच औषधी व सौंदर्य प्रसाधने कायदा 1940 अंतर्गत चिकलठाणा पोलीस ठाण्यात गुन्हा दाखल करण्यात आला असून पुढील तपास सुरू आहे.

ही कारवाई पोलीस अधीक्षक डॉ. विनयकुमार राठोड आणि अपर पोलीस अधीक्षक अन्नपूर्णा सिंह यांच्या मार्गदर्शनाखाली पोलीस निरीक्षक विजयसिंह राजपूत यांच्या नेतृत्वाखाली करण्यात आली. पथकात सपोनी संतोष मिसळे, पोह. सचिन सोनार, रविंद्र लोखंडे, अंगद तिडके, गोपाल पाटील, सुनिल गोरे, सुरोशे, सरला जाधव, दुबिले, खरात, निलेश कुडे तसेच अन्न व औषध प्रशासन विभागाचे निरीक्षक मनोज पैठणे यांचा समावेश होता.

👉 गुन्हेगारीवर नेमकी कारवाई — शहर पोलिसांचा सतर्कपणा कायम!