पेट्रोल-डिझेल बचतीचा संदेश देत AIMIM नगरसेवकांकडून मनपा प्रशासनाला सायकली भेट; “जनतेचा पैसा जनतेच्या विकासासाठीच खर्च करा”

महाराष्ट्र वाणी

छत्रपती संभाजीनगर(औरंगाबाद) दि १८ :- महानगरपालिकेत AIMIM नगरसेवकांनी अनोख्या पद्धतीने प्रशासनाचे लक्ष वेधत महापौर, आयुक्त आणि सभापती यांना सायकली भेट दिल्या. पेट्रोल-डिझेलची बचत, अनावश्यक वाहन खर्चाला आळा आणि जनतेच्या पैशाचा वापर नागरिकांच्या विकासासाठी व्हावा, या उद्देशाने हा उपक्रम राबविण्यात आला.

महानगरपालिकेकडून कोट्यवधी रुपयांच्या नव्या वाहन खरेदीवर खर्च केला जात असताना शहरातील नागरिकांना पाणी, रस्ते, स्वच्छता आणि मूलभूत सुविधांसाठी संघर्ष करावा लागत असल्याचा आरोप AIMIM नगरसेवकांनी केला. प्रशासनाने आलिशान गाड्यांऐवजी पर्यावरणपूरक आणि खर्च बचतीच्या उपायांकडे वळावे, असा संदेश देण्यासाठी प्रतीकात्मक स्वरूपात सायकली भेट देण्यात आल्या.

यावेळी AIMIM पदाधिकाऱ्यांनी सांगितले की, शहरातील नागरिकांच्या करातून जमा होणारा निधी हा केवळ दिखाऊ खर्चासाठी नसून नागरिकांच्या कल्याणासाठी वापरला गेला पाहिजे. वाढते इंधन दर, प्रदूषण आणि आर्थिक ताण लक्षात घेता प्रशासनानेही आदर्श निर्माण करण्याची गरज असल्याचे त्यांनी नमूद केले.

“सायकल संस्कृतीमुळे पर्यावरण संवर्धनास चालना मिळेल, तसेच प्रशासनाने साधेपणा स्वीकारत जनतेसमोर सकारात्मक संदेश द्यावा,” असेही यावेळी सांगण्यात आले. AIMIM च्या या अनोख्या आंदोलनाची शहरात मोठी चर्चा रंगली असून नागरिकांकडूनही विविध प्रतिक्रिया उमटत आहेत.

“जनतेच्या पैशावर ऐश नव्हे, विकास हवा... AIMIM च्या सायकल संदेशाने मनपा प्रशासनाला दिला थेट इशारा!”