🌀 देश व्यापले मोसमी वारे; पुढील पाच दिवस पावसाचा जोर!

महाराष्ट्र वाणी न्युज 

मुंबई दि २९ जून :- यंदा नैर्ऋत्य मोसमी वाऱ्यांनी वेळेआधीच देश व्यापल्याने पावसाळ्याची दमदार सुरुवात झाली आहे. २९ जून रोजी संपूर्ण भारतात हे वारे सक्रिय झाले असून हे नेहमीच्या सरासरी वेळेपेक्षा तब्बल ९ दिवस आधीचे आगमन आहे. हवामान विभागाने पुढील पाच दिवस देशभरात पावसाचा जोर कायम राहण्याचा अंदाज वर्तवला आहे.

सामान्यतः हे वारे ८ जुलैपर्यंत देश व्यापतात. मात्र, यंदा २४ मे रोजीच केरळमध्ये पावसाचा प्रवेश झाला आणि लगेच २५ मेपासून तळकोकणातही पावसाची चाहूल लागली. पुढील काही दिवसांत मोसमी वाऱ्यांनी वेग पकडत १७ जूनपर्यंत संपूर्ण महाराष्ट्र व्यापला. विशेष म्हणजे यंदा मोसमी वाऱ्यांचे आगमन मागील १६ वर्षांच्या तुलनेत सर्वाधिक लवकर झाले आहे.

हवामान विभागाच्या माहितीनुसार, १ जूनपासून आतापर्यंत देशभरात सरासरीच्या तुलनेत ९ टक्के अधिक पाऊस पडला आहे, तर महाराष्ट्रात हा आकडा १० टक्क्यांवर आहे.

 पुढील पाच दिवसांची पावसाची शक्यता:

कोकण आणि मध्य महाराष्ट्र: मुसळधार ते अतिवृष्टीचा इशारा.

विदर्भ: वीजेच्या कडकडाटासह पावसाची शक्यता.

मराठवाडा: हलक्या ते मध्यम स्वरूपाचा पाऊस.

इशारे:

ऑरेंज अलर्ट – सिंधुदुर्ग, रत्नागिरी, कोल्हापूर, सातारा

यलो अलर्ट – पुणे, रायगड आणि संपूर्ण विदर्भ

यंदा पावसाळ्याने वेळेआधीच आपली ताकद दाखवून दिली आहे. त्यामुळे शेतकरी, नागरिक आणि प्रशासन यांच्यासाठीही पुढील काही दिवस अत्यंत महत्त्वाचे ठरणार आहेत.

पावसाची चाहूल हीच! आता तयारीची वेळ आली आहे!