“निधीचा खेळ…! शरद पवारांचा महायुतीवर थेट प्रहार”

महाराष्ट्र वाणी 

बारामती दि २७ :- महायुतीतील तीनही घटक पक्ष राज्य सरकारकडून मिळणाऱ्या निधीचं श्रेय स्वतःकडे खेचण्याची स्पर्धाच रंगल्याचं आज बारामतीत स्पष्ट दिसलं. यावर ज्येष्ठ नेते शरद पवार यांनी जोरदार प्रतिक्रिया दिली. गोविंदबाग येथे दौऱ्यानिमित्त बोलताना त्यांनी राज्यातील राजकीय वातावरणावर भाष्य केलं.

स्थानिक स्वराज्य संस्थांच्या निवडणुकीत कधी अर्थखाते आमच्याकडे, कधी मालक फडणवीस, तर कधी नगरविकास आमच्याकडे — अशा घोषणांतून महायुतीचे नेते मतदारांना प्रभावित करण्याचा प्रयत्न करत आहेत. यावर टीका करताना पवार म्हणाले की,

“काम दाखवून मतं मागण्याऐवजी पैसे–निधी देण्याचं आमिष दाखवण्याची प्रवृत्ती वाढतेय… आणि ही गोष्ट राज्याच्या राजकारणासाठी निश्चितच चांगली नाही.”

🔹 आरक्षणाबाबत सर्वोच्च न्यायालयाच्या सुनावणीवर प्रतिक्रिया

स्थानीय संस्थांच्या निवडणुकीत आरक्षणाची मर्यादा ओलांडल्याप्रकरणी सुरू असलेल्या खटल्याबाबत त्यांनी सांगितले की,

“सुप्रीम कोर्टाचा दृष्टिकोन या प्रकरणात खूप कडक जाणवतो. पुढील दोन दिवसांत कोणता निकाल लागेल, हे सांगणं कठीण आहे.”

🔹 ‘माझ्यासारखे लोक अशा निवडणुकांत पडत नाहीत’ — पवारांचा थेट पवित्रा

स्थानिक निवडणुकांत वाढलेल्या गटबाजीवर बोलताना पवार म्हणाले,

“अनेक राष्ट्रीय नेत्यांनी स्थानिक निवडणुकांत मोठं राजकारण आणू नये अशी भूमिका घेतली होती. पण आता ठिकठिकाणी गट तयार झालेत आणि तेच गट वेगवेगळ्या पक्षांसोबत लढत आहेत. यामध्ये परस्परांतील समन्वयच दिसत नाही.”

तसेच त्यांनी स्पष्ट केलं की,

“मी अशा निवडणुकांत आधीही पडलो नाही आणि आजही नाही. अंतिम निर्णय जनताच देणार आहे.

"राजकारणात फॉर्म्युला बदलला… पण मतदारांचा निर्णय नेहमीच अंतिम!"