"डि-24 न्यूजचा डिजिटल मीडियामध्ये ठसा – पहिल्या राज्यस्तरीय अधिवेशनात सन्मान"
Maharashtra Vaani 
छत्रपती संभाजीनगर (औरंगाबाद), दि.14 (प्रतिनिधी) :
अखिल भारतीय मराठी पत्रकार परिषद संलग्न डिजिटल मीडीया परिषदेचे पहिले राज्यस्तरीय अधिवेशन आज दिनांक 14 सप्टेंबर रोजी संत एकनाथ रंगमंदिर येथे पार पडले. या अधिवेशनात डिजिटल पत्रकारितेमध्ये उल्लेखनीय कार्य केल्याबद्दल डि-24 न्यूज या मराठी वेबपोर्टलचा जाहीर सन्मान करण्यात आला.
गेल्या पाच वर्षांपासून डि-24 न्यूजने नवीन तंत्रज्ञानाचा वापर करून वाचकांना तत्परतेने ताज्या बातम्या पोहोचवल्या असून, सोशल मीडियावर आपली स्वतंत्र छाप निर्माण केली आहे. याच उल्लेखनीय योगदानाबद्दल जेष्ठ पत्रकार आरेफ देशमुख यांना मान्यवरांच्या हस्ते स्मृतिचिन्ह, शाल व श्रीफळ देऊन सन्मानित करण्यात आले.
या कार्यक्रमाला अखिल भारतीय मराठी पत्रकार परिषदेचे मुख्य विश्वस्त एस.एम. देशमुख, राज्यसभेचे खासदार डॉ. भागवत कराड, अध्यक्ष मिलिंद अष्टिवकर, जेष्ठ संपादक तुळशीराम भोईटे, जेष्ठ पत्रकार अब्दुल कदीर, स.सो. खंडाळकर, अभिव्यक्ती न्यूज चॅनलचे रवींद्र पोखरकर, विश्वस्त किरण नाईक, शरद पाबळे, अध्यक्ष अनिल वाघमारे, कार्याध्यक्ष शिवराज काटकर, सुरेश नाईकवाडे, कोषाध्यक्ष मन्सूर भाई शेख यांच्यासह विविध मान्यवर उपस्थित होते.
या सन्मानामुळे डि-24 न्यूजच्या कार्याचा गौरव झाल्याचे बोलले जात असून, पत्रकारिता क्षेत्रात अभिनंदनाचा वर्षाव होत आहे.
