जनगणना कामातील उत्कृष्टतेचा सन्मान; AMC झोन ३ मध्ये शेख अब्दुल रहीम प्रथम, विशेष गौरवाने सत्कार

महाराष्ट्र वाणी

छत्रपती संभाजीनगर (औरंगाबाद) दि ५ :- महानगरपालिका (AMC) अंतर्गत झोन क्रमांक ३ मध्ये राष्ट्रीय महत्त्वाच्या जनगणना कार्यात उत्कृष्ट आणि दर्जेदार कामगिरी केल्याबद्दल कर्मचारी गौरव सोहळ्याचे आयोजन करण्यात आले. यामध्ये शेख अब्दुल रहीम यांनी झोन ३ मध्ये प्रथम क्रमांक पटकावत उल्लेखनीय यश संपादन केले. त्यांच्या या कामगिरीबद्दल मनपा प्रशासनाच्या वतीने त्यांचा विशेष सत्कार करण्यात आला.

शहर जनगणना प्रमुख तथा उपआयुक्त अर्पणा थेटे, सहाय्यक आयुक्त व झोन ३ चे चार्ज ऑफिसर शेख रफिक तसेच जनगणना विभागाचे सहायक आयुक्त गोविंद बारबोटे यांच्या हस्ते हा सन्मान सोहळा पार पडला.

दर्जेदार कामगिरीची दखल

जनगणना कार्य वेळेत, अचूकतेने आणि प्रभावीपणे पूर्ण केल्याबद्दल शेख अब्दुल रहीम यांच्यासह त्यांच्या सुपरवायझर फसाहत अफशा खान यांचाही विशेष सत्कार करण्यात आला. यावेळी त्यांना पुष्पगुच्छ आणि भेटवस्तू देऊन गौरविण्यात आले. झोन ३ अंतर्गत त्यांनी केलेल्या उल्लेखनीय कामाची दखल घेत मनपा प्रशासनाने हा सन्मान प्रदान केला.

‘हा बहुमान आमच्या परिश्रमांची पोचपावती’

या सन्मानाबद्दल भावना व्यक्त करताना शेख अब्दुल रहीम म्हणाले, “यापूर्वीही माझ्या कार्याची दखल घेत महानगरपालिका आयुक्त अमोल येडगे यांच्या हस्ते मला सन्मानित करण्यात आले होते. आज पुन्हा मिळालेला हा गौरव आमच्यासाठी अभिमानाचा क्षण आहे. हा बहुमान आमच्या अविरत परिश्रमांची पोचपावती असून भविष्यात आणखी जोमाने आणि जबाबदारीने काम करण्याची प्रेरणा देणारा आहे. या यशाबद्दल आम्ही सर्वोच्च अल्लाहचे मनःपूर्वक आभार मानतो.”

प्रशासनाकडून कौतुक

यावेळी उपआयुक्त अर्पणा थेटे, सहाय्यक आयुक्त शेख रफिक आणि सहायक आयुक्त गोविंद बारबोटे यांनी शेख अब्दुल रहीम व त्यांच्या टीमचे विशेष कौतुक केले. महानगरपालिकेतील इतर कर्मचाऱ्यांनीही त्यांच्या कार्याचा आदर्श घेऊन उत्कृष्ट व गतिमान कामगिरी करावी आणि मनपाचा नावलौकिक वाढवावा, अशी अपेक्षा त्यांनी व्यक्त केली.

शेख अब्दुल रहीम आणि त्यांच्या टीमला मिळालेल्या या सलग सन्मानामुळे झोन ३ परिसरात आनंदाचे वातावरण असून विविध स्तरांतून त्यांच्यावर अभिनंदनाचा वर्षाव होत आहे.

— जनगणना कार्यातील उत्कृष्टता आणि समर्पणाचा हा गौरव इतर कर्मचाऱ्यांसाठीही प्रेरणादायी ठरत आहे.