"घाटीत रुग्णांना दर्जेदार सेवा द्या" – अंबादास दानवे यांची सूचनात्मक भेट

महाराष्ट्र वाणी न्युज 

छत्रपती संभाजीनगर(औरंगाबाद) दि ८ ऑगस्ट :- “घाटी हे सर्वसामान्यांचं रुग्णालय असून, येथे येणाऱ्या प्रत्येक रुग्णाला दर्जेदार आणि मानवतावादी सेवा मिळाली पाहिजे,” असे प्रतिपादन विधानपरिषद विरोधी पक्षनेते अंबादास दानवे यांनी शुक्रवारी घाटी रुग्णालयाच्या दौऱ्यात केले. विविध वॉर्डांना भेट देत त्यांनी रुग्णांशी संवाद साधला आणि आरोग्यसेवेचा थेट आढावा घेतला.

घाटीचे अधिष्ठाता डॉ. शिवाजी सुक्रे यांनी स्वागत करून सुरु असलेल्या योजनांची माहिती दिली. यामध्ये रुग्णांच्या सेवेसाठी सुरु असलेल्या विविध उपक्रमांचे सादरीकरण करण्यात आले. दानवे यांनी या उपक्रमांचे विशेष कौतुक केले आणि शासनस्तरावरून प्रलंबित कामे मार्गी लावण्यासाठी पुढाकार घेण्याचे आश्वासन दिले.

मराठवाडा, विदर्भ, खान्देश आदी भागांतून मोठ्या प्रमाणावर रुग्ण घाटीत येतात. यासाठी आरोग्यसेवा सक्षम ठेवण्याचे महत्त्व दानवे यांनी अधोरेखित केले.

यावेळी अनेक वरिष्ठ डॉक्टर, वैद्यकीय अधिकारी, कर्मचारी आणि शिवसेनेचे पदाधिकारी उपस्थित होते.

 शेवटी म्हणतोच – सामान्यांचा दवाखाना असलेल्या 'घाटी'ला नवा श्वास द्यायची हीच ती वेळ!