खुलताबादला ‘मॉडेल सिटी’ बनवण्याचा संकल्प; NCP उमेदवारांच्या समर्थनार्थ आ. सना मलीक व आमदार सतीष चव्हाण यांची जाहीर सभा

महाराष्ट्र वाणी 

खुलताबाद दि २९ :- नगर परिषद निवडणुकीत राष्ट्रवादी काँग्रेस पक्षाच्या (NCP) उमेदवारांच्या प्रचारार्थ आ. सना मलीक यांच्या प्रमुख उपस्थितीत खुलताबाद शहरात भव्य जाहीर सभेचे आयोजन करण्यात आले. नगराध्यक्ष पदासाठी NCPचे अधिकृत उमेदवार हाजी अकबर बेग तसेच सर्व प्रभागातील उमेदवारांना प्रचंड बहुमताने विजयी करण्याचे आवाहन यावेळी करण्यात आले.

सभेत बोलताना आ. सना मलीक यांनी सांगितले की, खुलताबाद शहर आणि तालुका पर्यटनदृष्ट्या जागतिक पातळीवर ओळखला जातो. देशविदेशातून हजारो पर्यटक दरवर्षी येथे भेट देतात; परंतु पर्यटनस्थळांवर मूलभूत सोयीसुविधांचा मोठा अभाव आहे. विविध जाती-धर्मांचे नागरिक एकमेकांच्या सहकार्याने राहणारे खुलताबाद शहर “मॉडेल सिटी” म्हणून विकसित करणे हा राष्ट्रवादी काँग्रेसचा संकल्प असल्याचे त्यांनी स्पष्ट केले.

आमदार सतीष चव्हाण यांनीही सभेत भाषण करताना मागील तीन वर्षांत अजितदादा पवार यांच्या माध्यमातून खुलताबाद-गंगापूर मतदारसंघासाठी 150 कोटींपेक्षा जास्त निधी आणल्याचे सांगितले. यातून खुलताबाद शहरासाठीच जवळपास 54 कोटी 52 लक्ष रुपये मंजूर करण्यात आल्याचे ते म्हणाले. या निधीतून ट्रॉमा केअर सेंटर, पाणीपुरवठा प्रकल्प, अंतर्गत रस्त्यांचे काम यांसह अनेक विकास कामे पूर्ण झाल्याचे त्यांनी नमूद केले. शहराच्या सर्वांगीण विकासासाठी हाजी अकबर बेग आणि सर्व नगरसेवक पदाचे अधिकृत उमेदवारांना घड्याळ चिन्हावर मतदान करण्याचे आवाहन त्यांनी केले.

याप्रसंगी राष्ट्रवादी काँग्रेसचे ज्येष्ठ नेते श्री. जगन्नाथ बापू खोसरे, माजी नगराध्यक्ष एस. एम. खमर, माजी नगराध्यक्ष अ‍ॅड. कैसरुद्दीन, तालुकाध्यक्ष सुरेश जाधव, शहराध्यक्ष गजानन फुलारे, सौ. शोभाताई खोसरे, सौ. भाग्यश्री राजपूत, सौ. अंकिता विधाते, सौ. अंजू नागे, अनुराग शिंदे, शेख कय्यूम आदी मान्यवर उपस्थित होते. शहरातील नागरिकांनीही मोठ्या संख्येने सहभाग नोंदवला.

खुलताबादच्या विकासाला गती देणारे निर्णय आता जनता मतदानातून घेणार आहे.