खुलताबादच्या विकासासाठी ‘हात’ आणि ‘मशाल’ला साथ द्या – अमित देशमुखांचे आवाहन

महाराष्ट्र वाणी 

खुलताबाद दि २९ :- सर्वधर्मसमभाव आणि समृद्ध ऐतिहासिक-सांस्कृतिक वारसा जपणारे खुलताबाद हे शहर देशभरात आपली वेगळी ओळख राखून आहे. हा लौकिक टिकवून शहराला विकासाच्या नव्या वाटेवर नेण्यासाठी काँग्रेस आणि शिवसेना (उद्धव बाळासाहेब ठाकरे) आघाडीच्या उमेदवारांना विजयी करा, असे आवाहन काँग्रेसचे आमदार व माजी मंत्री अमित देशमुख यांनी काल दिनांक 28 रोजी खुलताबाद येथील जाहीर सभेत केले.

केंद्र आणि राज्यातील महायुती सरकारवर जोरदार टीका करताना ते म्हणाले की, “स्वतःला महायुती म्हणवणाऱ्यांना नगरपरिषद निवडणुकीत स्वतःची युतीसुद्धा टिकवता आली नाही. स्वार्थ आणि आपमतलबीपणामुळे लोकहितापेक्षा स्वतःचा फायदा साधण्यावर त्यांचे जास्त लक्ष आहे. त्यामुळे धार्मिक द्वेष, अफवा आणि खोटारडेपणा पसरवून निवडणुका जिंकण्याचा हा प्रयत्न सुरु आहे. खुलताबादकरांनी आजवर अशा प्रवृत्तीला कधीच थारा दिला नाही.”

खुलताबादच्या पाणी समस्येवर बोलताना देशमुख म्हणाले, “सुमारे २० कोटी खर्चाच्या पाणीपुरवठा योजनेस मंजुरी मिळवून दिली असून ही योजना पूर्ण झाल्यावर शहराला स्वच्छ आणि नियमित पाणी मिळणार आहे.”

तसेच शहरातील पर्यटनस्थळांचा विकास, सर्व रस्त्यांचे काँक्रीटीकरण आणि नियमित प्रकाशव्यवस्था ही पुढील प्राधान्याची कामे असतील, असेही त्यांनी स्पष्ट केले.

शहरात शांतता टिकवून विकासाला गतिमान करण्यासाठी नगरपरिषद निवडणुकीत ‘हाताचा पंजा’ व ‘मशाल’ चिन्हासमोरील बटन दाबून आघाडीच्या सर्व उमेदवारांना मोठ्या मतांनी विजयी करा, असे आवाहन त्यांनी शेवटी केले.

सभेला खासदार डॉ. कल्याण काळे, माजी आमदार नामदेवराव पवार, प्रदेश सरचिटणीस डॉ. जितेंद्र देहाडे, जिल्हाध्यक्ष किरण पाटील डोणगावकर, तालुका अध्यक्ष किरण नलावडे, शहराध्यक्ष अब्दुल माजिद पटेल, माजी शहराध्यक्ष समद शेख, अनिल श्रीखंडे, नगराध्यक्ष पदाचे उमेदवार सय्यद अमीर पटेल, काँग्रेस व शिवसेना (उबाठा) चे सर्व उमेदवार, पक्षाचे पदाधिकारी आणि हजारो नागरिकांची उपस्थिती होती.

महाराष्ट्र वाणी — सत्यासाठी, समाजासाठी.