मतदानाच्या दिवशी दिशाभूल करणारा व्हिडीओ प्रसारित केल्याचा आरोप; खासदार डॉ. कल्याण काळे यांची पोलिसांत धाव!

छत्रपती संभाजीनगर (औरंगाबाद) दि २३ :- औरंगाबाद विभाग पदवीधर मतदारसंघाच्या निवडणुकीसाठी मतदान सुरू असतानाच तंत्रज्ञानाच्या साहाय्याने आपल्याबाबत दिशाभूल करणारा व्हिडीओ तयार करून प्रसारित केल्याचा गंभीर आरोप खासदार डॉ. कल्याण काळे यांनी केला आहे. या प्रकरणाची सखोल चौकशी करून संबंधित व्यक्तींविरुद्ध कायदेशीर कारवाई करावी, अशी मागणी त्यांनी चिकलठाणा पोलीस ठाण्यात लेखी तक्रारीद्वारे केली आहे. मतदानाच्या दिवशीच हा प्रकार समोर आल्याने राजकीय वर्तुळात चर्चेला उधाण येण्याची शक्यता आहे.

व्हॉट्सॲप ग्रुपवर व्हिडीओ प्रसारित केल्याचा आरोप

खासदार डॉ. कल्याण काळे यांनी दिलेल्या तक्रारीनुसार, शुक्रवार, २३ ऑक्टोबर रोजी पदवीधर मतदारसंघाची मतदान प्रक्रिया सुरू असताना ते पिसादेवी येथे उपस्थित होते. यावेळी छत्रपती संभाजीनगर जिल्हा काँग्रेसचे अध्यक्ष किरण पाटील डोणगावकर यांनी मोबाईलद्वारे काही छायाचित्रे आणि व्हिडीओ पाठवून हा प्रकार त्यांच्या निदर्शनास आणून दिला.

तक्रारीत नमूद केल्यानुसार, संबंधित व्हिडीओ ‘सतिश भाऊ चव्हाण मित्र मंडळ’ या नावाच्या व्हॉट्सॲप ग्रुपवर प्रसारित झाल्याचे दिसून आले. तसेच, तो प्रसारित करणाऱ्या व्यक्तीचे नाव ‘फोटोग्राफर सतीश चव्हाण’ असे दिसत असल्याचे तक्रारीत म्हटले आहे. संबंधित व्हिडीओ आणि व्हॉट्सॲप ग्रुपचे स्क्रीनशॉट पुरावे म्हणून पोलिसांकडे सादर करण्यात आल्याचेही त्यांनी नमूद केले आहे.

‘मतदारांमध्ये संभ्रम निर्माण करण्याचा प्रयत्न’

निवडणुकीच्या मतदानादरम्यान तंत्रज्ञानाचा गैरवापर करून दिशाभूल करणारा व्हिडीओ प्रसारित करणे, आपली प्रतिमा मलिन करण्याचा प्रयत्न करणे आणि मतदारांमध्ये संभ्रम निर्माण करणे, हा गंभीर प्रकार असल्याचे डॉ. काळे यांनी तक्रारीत म्हटले आहे. अशा घटनांमुळे निवडणूक प्रक्रियेच्या निष्पक्षतेवर परिणाम होण्याची शक्यता असून, या प्रकरणात आदर्श आचारसंहितेचा भंग किंवा अन्य कायदेशीर उल्लंघन झाले आहे का, याची तपासणी करण्याची मागणी त्यांनी केली आहे.

डिजिटल पुराव्यांची तांत्रिक तपासणी करण्याची मागणी

या प्रकरणातील व्हिडीओचा मूळ स्रोत शोधण्यात यावा, तो तयार करणाऱ्या व प्रसारित करणाऱ्या व्यक्तींची तसेच अन्य संबंधितांची चौकशी करण्यात यावी, अशी मागणी तक्रारीत करण्यात आली आहे. उपलब्ध डिजिटल पुरावे सुरक्षित ठेवून त्यांची तांत्रिक तपासणी करावी आणि तपासाअंती दोषी आढळणाऱ्यांविरुद्ध लागू कायद्यानुसार कारवाई करावी, असेही डॉ. काळे यांनी म्हटले आहे.

याशिवाय, आदर्श आचारसंहितेचा भंग झाल्याचे निष्पन्न झाल्यास संबंधित सक्षम निवडणूक प्राधिकरणाला माहिती देऊन नियमानुसार कार्यवाही करावी, तसेच तक्रारीवर केलेल्या कारवाईची माहिती लेखी स्वरूपात द्यावी, अशी मागणीही त्यांनी केली आहे.

पोलिसांच्या चौकशीनंतरच वस्तुस्थिती स्पष्ट होणार

लोकशाही व्यवस्थेत निवडणूक प्रक्रिया निर्भय, निष्पक्ष आणि पारदर्शक वातावरणात पार पडणे आवश्यक आहे. आधुनिक तंत्रज्ञानाचा वापर करून खोटी किंवा दिशाभूल करणारी माहिती पसरवली जात असल्यास अशा प्रकारांना आळा घालणे गरजेचे असल्याचे डॉ. काळे यांनी तक्रारीत नमूद केले आहे.

दरम्यान, संबंधित व्हिडीओची सत्यता, तो तयार करण्यामागील उद्देश आणि त्याच्या प्रसारणामागील व्यक्तींची भूमिका याबाबत पोलिसांच्या चौकशीनंतरच वस्तुस्थिती स्पष्ट होणार आहे. तक्रारीतील आरोप अद्याप तपासाधीन असून, संबंधित व्यक्ती दोषी असल्याचे अद्याप सिद्ध झालेले नाही.

महाराष्ट्र वाणी | सत्यासाठी निर्भीड, जनतेसाठी समर्पित