जामनेरमध्ये साधना महाजन यांच्या बिनविरोध निवडीवर प्रश्नचिन्ह? पाचोरा प्रकरणानंतर विरोधकांच्या आशा पुन्हा जागृत

महाराष्ट्र वाणी 

जळगाव दि २६ :- जामनेर नगरपरिषद निवडणुकीत मंत्री गिरीश महाजन यांच्या पत्नी साधना महाजन यांची नगराध्यक्षपदी बिनविरोध निवड निश्चित मानली जात होती. मात्र, महाविकास आघाडीने या प्रक्रियेवर न्यायालयीन दाद मागितल्यानंतर परिस्थिती बदलू शकते, अशी शक्यता पुन्हा निर्माण झाली आहे. कारण, याच संदर्भातील जवळपास समान प्रकरणात पाचोऱ्यातील एका उमेदवाराला जिल्हा सत्र न्यायालयाने दिलासा दिला आहे.

जामनेरमध्ये नगराध्यक्षपदासाठी चार महिला उमेदवारांचे अर्ज पात्र ठरले होते. मात्र अर्ज माघारीच्या वेळी महाविकास आघाडीच्या तिन्ही महिला उमेदवारांनी अनपेक्षितपणे माघार घेतली. त्यामुळे साधना महाजन यांचा मार्ग मोकळा झाला. या अचानक घडलेल्या घटनाक्रमाबाबत "आम्हाला कुठलीही माहिती देण्यात आली नव्हती", असा आरोप महाविकास आघाडीकडून केला जात आहे.

याशिवाय भाजपने निवडणूक आयोगाने रात्रीतून केलेल्या सूचक संख्येतील बदलाचा फायदा घेतल्याचाही आरोप आहे. आघाडीचे डमी उमेदवार ज्योत्सना विसपुते यांचा अर्ज एकाच सूचक असल्याच्या कारणावरून छाननीपूर्वीच बाद ठरवण्यात आला. त्यानंतर मुख्य उमेदवार प्रतिभा झाल्टे यांनीही माघार घेतल्याने महाविकास आघाडी मैदानाबाहेर गेली.

याच निर्णयाविरोधात ज्योत्सना विसपुते यांनी जिल्हा सत्र न्यायालयात अपील दाखल केले आहे. दरम्यान पाचोरा नगरपरिषदेतील भाजप उमेदवार अमरीन देशमुख यांचा अर्जही सूचक बदलाच्या निर्णयामुळे बाद करण्यात आला होता. त्यांनी दाखल केलेल्या अपीलमध्ये न्यायालयाने त्यांना दिलासा देत अर्ज वैध ठरवला.

हीच परिस्थिति लक्षात घेता, जामनेरमधील प्रकरणातही न्यायालय समान निर्णय देऊ शकते, अशी शक्यता उपस्थित झाली आहे. त्यामुळे आधीच ‘बिनविरोध’ ठरलेली साधना महाजन यांची निवड पुन्हा चर्चेच्या केंद्रस्थानी आली आहे.