“ई-केवायसी अनिवार्य; नाहीतर ‘लाडकी बहीण’ खात्यात पैसे जमा होणार नाहीत!”

महाराष्ट्र वाणी न्युज 

मुंबई दि २५ :- राज्य सरकारच्या महत्वाकांक्षी माझी लाडकी बहीण योजनेवरुन सध्या मोठी चर्चा रंगली आहे. अलीकडच्या काळात लाखो बोगस लाभार्थी उघडकीस आल्यानंतर सरकारने आता कठोर पावले उचलली आहेत.

सरकारकडून घेतलेल्या नव्या निर्णयानुसार, पुढील काळात सर्व लाभार्थींना ई-केवायसी करणे बंधनकारक राहणार आहे. जर हे काम वेळेत पूर्ण केले नाही, तर पात्र महिलांच्या खात्यात दरमहा मिळणारे ₹1500 जमा होणार नाहीत.

बोगस लाभार्थ्यांवर कारवाई

जून महिन्यापासून तब्बल २६ लाखांहून अधिक महिलांचा लाभ थांबवण्यात आला आहे. सुरुवातीला या योजनेचा लाभ घेणाऱ्या महिलांची संख्या २ कोटी ६३ लाख होती, मात्र छाननीनंतर आता केवळ २ कोटी ४१ लाख महिलांनाच लाभ मिळत आहे.

कोण ठरणार अपात्र?

वार्षिक उत्पन्न ₹2.5 लाखांपेक्षा जास्त असणाऱ्या कुटुंबातील महिला

कुटुंबात सरकारी/निवृत्त कर्मचारी असणाऱ्या

आयकर भरणारे, आमदार/सांसद किंवा उच्चपदस्थ अधिकारी यांच्या कुटुंबातील महिला

चारचाकी वाहनधारक (ट्रॅक्टर अपवाद)

इतर सरकारी योजनांमधून दरमहा लाभ घेणाऱ्या महिला

लग्नानंतर इतर राज्यात स्थलांतरित झालेल्या महिला

विरोधकांचा सरकारवर निशाणा

निवडणुकीआधी सरसकट महिलांना मदत जाहीर करणाऱ्या सरकारवर आता विरोधकांनी हल्लाबोल केला आहे. छाननीच्या नावाखाली लाखो महिलांना योजनेतून बाहेर काढले जात असल्याचा त्यांचा आरोप आहे. दरम्यान, बोगस लाभ घेणाऱ्या काही कर्मचाऱ्यांवर कारवाई होणार का, याकडे सर्वांचे लक्ष लागले आहे.

“लाडकी बहिणींच्या खात्यातील १५०० रुपयांवर आता ‘ई-केवायसी’ची छाप!”