"मराठवाड्याचा दुष्काळ हद्दपार करणार; भाजपा विजयी करा! – फडणवीसांचा खुलताबादमध्ये गर्जनात्मक संदेश"

महाराष्ट्र वाणी 

खुलताबाद, दि २५ :- “संकल्प विकसित मराठवाड्याचा, निर्धार भाजपाच्या विजयाचा” असा दमदार नारा देत मुख्यमंत्री देवेंद्र फडणवीस यांनी आज खुलताबाद येथे झालेल्या भव्य जाहीर सभेत जनतेसमोर आपली विकासकामांची बांधिलकी स्पष्ट केली. स्थानिक स्वराज्य संस्थांच्या निवडणुकांच्या प्रचाराला वेग आला असून भाजपच्या नगराध्यक्ष पदाच्या उमेदवारांच्या प्रचारार्थ ही सभा आयोजित करण्यात आली होती.

खुलताबाद नगराध्यक्ष पदाचे उमेदवार परसराम बारगळ पाटील, गंगापूरचे प्रदीप पाटील, कन्नडचे संतोष कोल्हे, फुलंब्रीचे सुहास शिरसाट आणि वैजापूरचे डॉ. दिनेश परदेशी यांच्या समर्थनार्थ मुख्यमंत्री फडणवीस यांनी जनसमुदायाला संबोधित केले.

मुख्यमंत्री म्हणाले, “मराठवाड्यातील दुष्काळ कायमस्वरूपी दूर करण्याचा आमचा संकल्प आहे. पुढील पिढीला दुष्काळाची झळ बसू देणार नाही. नदीजोड प्रकल्प अंतिम टप्प्यात असून कोकणातून 54 टीएमसी पाणी आणून मराठवाड्याचा दुष्काळ संपवणार आहोत.”

ते पुढे म्हणाले, “पिण्याच्या पाण्याच्या योजना युद्धपातळीवर सुरू आहेत. गंगापूर–वैजापूर ग्रीड योजनेलाही मंजुरी दिली आहे. सत्ता मिळाल्यानंतर सर्व विकासकामांना अधिक गती देऊन लोकांच्या जीवनात मोठे परिवर्तन घडवू.”

सभेला मंत्री अतुल सावे, खासदार डॉ. भागवत कराड, आमदार प्रशांत बंब, आमदार संजय केनेकर, आमदार अनुराधा चव्हाण तसेच इतर मान्यवर उपस्थित होते.

मराठवाड्याच्या विकासाचा नवा रोडमॅप आज खुलताबादच्या रणांगणात ऐकायला मिळाला!