🏆 भंडाऱ्याच्या डॉ. नमीरा सिद्दीकी यांची देशात बाजी; NEET MDS परीक्षेत प्रथम क्रमांकाचा मान!

महाराष्ट्र वाणी

भंडारा (प्रतिनिधी) दि ३ :- जिल्ह्याच्या शिरपेचात आणखी एक मानाचा तुरा रोवणारी अभिमानास्पद कामगिरी डॉ. नमीरा सिद्दीकी यांनी केली आहे. राष्ट्रीय स्तरावरील अत्यंत प्रतिष्ठित NEET MDS (नीट एमडीएस) प्रवेश परीक्षेत देशातून प्रथम क्रमांक मिळवत त्यांनी महाराष्ट्रासह संपूर्ण विदर्भाचे नाव उज्ज्वल केले आहे.

मूळच्या भंडारा येथील रहिवासी असलेल्या डॉ. नमीरा सिद्दीकी यांनी नागपूर जिल्ह्यातील वानाडोंगरी, हिंगणा येथील स्व. दादासाहेब काळमेघ दंत महाविद्यालयातून बीडीएस पदवीचे शिक्षण पूर्ण केले आहे. कठोर परिश्रम, सातत्यपूर्ण अभ्यास आणि जिद्दीच्या जोरावर त्यांनी राष्ट्रीय स्तरावरील या स्पर्धात्मक परीक्षेत अव्वल स्थान पटकावत उल्लेखनीय यश संपादन केले.

डॉ. नमीरा यांच्या या यशामुळे त्यांच्या कुटुंबीयांसह शैक्षणिक क्षेत्रात आनंदाचे वातावरण निर्माण झाले आहे. वैद्यकीय शिक्षण घेणाऱ्या विद्यार्थ्यांसाठी त्यांचे यश प्रेरणादायी ठरत असून, ग्रामीण भागातील विद्यार्थ्यांनाही मोठी उमेद देणारे आहे.

दरम्यान, राज्याचे महसूल मंत्री Chandrashekhar Bawankule यांनी डॉ. नमीरा सिद्दीकी यांचे मनःपूर्वक अभिनंदन केले. त्यांनी आपल्या शुभेच्छा संदेशात डॉ. नमीरा यांच्या उज्ज्वल भविष्यासाठी शुभेच्छा देत त्यांच्या या यशाचे कौतुक केले.

डॉ. नमीरा सिद्दीकी यांच्या या ऐतिहासिक यशामुळे भंडारा जिल्हा, विदर्भ आणि महाराष्ट्राच्या शैक्षणिक क्षेत्राचा गौरव अधिक उंचावला आहे.

👉 “जिद्द, मेहनत आणि ध्येयाप्रती निष्ठा असेल तर राष्ट्रीय स्तरावरही यशाचे शिखर गाठता येते,” हे डॉ. नमीरा सिद्दीकी यांनी आपल्या यशातून सिद्ध करून दाखवले आहे.