डॉ. रोमा तांबोळी UPSC आरोग्य विभागात देशात १४ वा क्रमांक, दिल्लीला वैद्यकीय अधिकारी म्हणून नियुक्ती

महाराष्ट्र वाणी न्युज 

छत्रपती संभाजीनगर / परभणी प्रतिनिधी दि २१ :- गंगाखेड तालुक्यातील राणीसावरगाव या छोट्याशा गावातून थेट देशाच्या राजधानीपर्यंत पोहोचत शेतकरी कन्या डॉ. रोमा मुजमील तांबोळी यांनी प्रेरणादायी यश मिळवले आहे. केंद्रीय लोकसेवा आयोगाच्या (UPSC) आरोग्य विभागाच्या राष्ट्रीय स्तरावरील स्पर्धा परीक्षेत त्यांनी देशात १४ वा क्रमांक पटकावत महाराष्ट्रातून अव्वल स्थान मिळवले. अवघ्या २७ व्या वर्षी मिळवलेले हे यश त्यांच्या कष्टाचे आणि चिकाटीचे द्योतक ठरले असून, दिल्ली येथील केंद्रीय सरकारी आस्थापनामध्ये वर्ग-१ वैद्यकीय अधिकारी म्हणून त्यांची नियुक्ती झाली आहे.

ग्रामीण पार्श्वभूमीतून राष्ट्रीय पातळीपर्यंत

डॉ. रोमा यांनी प्राथमिक शिक्षण गावात घेतले. पुढे त्यांनी नांदेड येथील शासकीय वैद्यकीय महाविद्यालयातून बी.ए.एम.एस. पदवी पूर्ण केली. एम.डी. अभ्यासक्रमासाठी पात्र ठरूनही त्यांचे लक्ष्य मोठे होते – देशसेवेच्या माध्यमातून आरोग्य क्षेत्रात जबाबदारीची भूमिका निभावणे. त्यामुळे त्यांनी नागपूर येथे UPSC साठी कठोर परिश्रम सुरू केले आणि अखेर बुधवारी जाहीर झालेल्या निकालात त्यांनी राष्ट्रीय स्तरावर आपली चमक दाखवली.

संघर्षातून उभी राहिलेली यशोगाथा

रोमा तांबोळी या मुजमील सरवर तांबोळी यांच्या कन्या आहेत. त्यांचे वडील अल्पभूधारक शेतकरी असून साऊंड सर्व्हिस व्यवसाय करतात. सहा मुलींना उच्च शिक्षण द्यायचे ठरवून त्यांनी संकटांशी झुंज दिली. आज या कुटुंबातील तीन मुली डॉक्टर, एक मुलगी बँक मॅनेजर, एक केमिकल इंजिनिअर तर धाकटी बी.टेक. विद्यार्थीनी आहे. मोठी मुलगी डॉ. शिफा तांबोळी उमरगा येथे तालुका वैद्यकीय अधिकारी म्हणून कार्यरत आहे.

मुलींसाठी प्रेरणेचा दीपस्तंभ

गावाचे माजी सरपंच अल्ताफ सय्यद सांगतात, “मुजमील तांबोळी यांनी मुलींना मुलांपेक्षा जास्त संधी दिल्या. त्यांच्या जिद्दीमुळे आज हे कुटुंब संपूर्ण महाराष्ट्रासाठी प्रेरणादायी ठरले आहे.”

डॉ. रोमा तांबोळींचा हा प्रवास ग्रामीण आणि सर्वसामान्य घरातील मुलींना मोठी उभारी देणारा आहे. मेहनत, चिकाटी आणि कुटुंबाचा पाठिंबा असेल तर कोणतेही स्वप्न साकार करता येते, याचे ते जिवंत उदाहरण ठरल्या आहेत. त्यांच्या यशामुळे राणीसावरगावचे नाव आता राष्ट्रीय पातळीवर झळकू लागले आहे.

✍️ “स्वप्न पाहा, मेहनत करा आणि चिकाटी ठेवा; यश निश्चितच मिळते” – डॉ. रोमा तांबोळींच्या कर्तृत्वातून उमटलेला संदेश.