जिल्ह्यातील CSP सेंटर चालकांची फसवणूक करणारी आंतरराज्यीय टोळी जेरबंद; नाशिकच्या दोघांना गजाआड!

महाराष्ट्र वाणी न्युज 

छत्रपती संभाजीनगर(औरंगाबाद) दि ८ :- ग्रामीण पोलिसांच्या सायबर पथकाने जिल्ह्यातील अनेक बँक ग्राहक सेवा केंद्र (CSP सेंटर) चालकांची फसवणूक करणाऱ्या आंतरराज्यीय टोळीला गजाआड केले आहे. या टोळीने महाराष्ट्रासह मध्यप्रदेशात अनेक ठिकाणी अशी फसवणूक केल्याचे उघड झाले आहे.

राजंणगाव पोळ, गंगापूर, ढोरकीन आणि वेरुळ येथील CSP सेंटरवर आरोपी जाऊन, “मला हॉस्पिटलचे बिल पेड करायचे आहे, वाहन रस्त्यात बिघडले आहे, लेबर पेमेंट द्यायचे आहे” अशा विविध कारणांनी केंद्र चालकाकडून QR कोड किंवा फोनपे क्रमांक मागायचे. त्यानंतर साथीदाराकडून त्या QR कोडवर पैसे ट्रान्सफर करून, चालकाकडून नगदी रक्कम (५० ते ८० हजार रुपयांपर्यंत) घेत पळ काढायचा.

यानंतर CSP सेंटर चालकांना अनोळखी क्रमांकावरून फोन येऊन, “तुमच्या खात्यात चुकून पैसे गेले आहेत” असे सांगून सायबर टोल फ्री 1930 वर तक्रार दाखल करायचे. त्यामुळे संबंधित CSP चालकाचे खाते गोठवले जाऊन, फसवणूक करणारे आरोपी न्यायालयातून ती रक्कम परत मिळवायचे.

राजु कचरु कुकलारे (रा. राजंणगाव पोळ, ता. गंगापूर) यांच्या फिर्यादीवरून सायबर पोलिस ठाण्यात गु.र. नं. 07/2025 भा.दं.वि. कलम 318(4), 3(5) बीएनएस सह 66(ड) आयटी अॅक्ट अंतर्गत गुन्हा दाखल करण्यात आला होता.

तांत्रिक तपासानंतर आरोपी हे जळगाव जिल्ह्यात असल्याची माहिती मिळाल्यावर पोलिसांनी मुक्ताईनगर परिसरातून त्यांचा शिताफीने पाठलाग करून ताबा घेतला. अटक आरोपींची नावे अशी आहेत —

1️⃣ राहिल युनुस शेख (वय 37, रा. वडाळा शिवार, नाशिक)

2️⃣ प्रविण चंपालाल वैष्णव (वय 47, रा. सिन्नर, नाशिक)

दोघांच्या ताब्यातून मारुती स्विफ्ट कार आणि अन्य साहित्य मिळून एकूण ३.३७ लाख रुपयांचा मुद्देमाल जप्त करण्यात आला. त्यांनी श्रीरामपूर, संगमनेर, जालना, जळगाव, मुक्ताईनगर, देऊळगावराजा (बुलढाणा) व मध्यप्रदेशातही अशा प्रकारे गुन्हे केल्याची कबुली दिली आहे.

ही कारवाई मा. पोलीस अधीक्षक डॉ. विनयकुमार राठोड यांच्या मार्गदर्शनाखाली सायबर पोलीस ठाण्याचे पोलीस निरीक्षक संजय देशमुख आणि त्यांच्या पथकातील सहाय्यक पोलीस निरीक्षक विजयसिंग जोनवाल, सफौ कैलाश कामठे, पोह. संतोष तांदळे, मुकेश वाघ आदींनी केली. तपासात सपोनि निशा बनसोड, पोलीस अंमलदार दत्ता तरटे, योगेश मोईम, गणेश घोरपडे, सविता जायभाये, योगेश तरमळे, जिवन घोलप, राजेश राठोड, शितल खंडागळे, पुजा म्हस्के यांनी सहकार्य केले.

दोन्ही आरोपी सध्या पोलिस कोठडीत असून पुढील तपास सुरू आहे.

सायबर पोलिसांनी आवाहन केले आहे की, CSP सेंटर चालकांनी अशा प्रकारच्या फसवणुकीपासून सावध राहावे आणि संशयास्पद घटनेबाबत तात्काळ सायबर पोलिस ठाणे छत्रपती संभाजीनगर ग्रामीण येथे संपर्क साधावा.

👉 सायबर फसवणुकीवर पोलिसांचा हल्लाबोल — सावध राहा, सुरक्षित राहा!