अल्पसंख्याक शाळांतील अतिरिक्त शिक्षकांना दिलासा! जिल्हा परिषद शाळांमध्ये तातडीने समायोजनाचे शिक्षण उपसंचालकांचे आदेश

महाराष्ट्र वाणी

छत्रपती संभाजीनगर(औरंगाबाद) दि २० :- जिल्ह्यातील अल्पसंख्याक खाजगी प्राथमिक शाळांमध्ये अतिरिक्त ठरलेल्या शिक्षकांचे जिल्हा परिषद शाळांमध्ये तातडीने आणि नियमानुसार समायोजन (Redeployment) करण्याचे स्पष्ट निर्देश विभागीय शिक्षण उपसंचालक कार्यालयाने दिले आहेत. यासंदर्भात छत्रपती संभाजीनगर जिल्हा परिषदेच्या प्राथमिक शिक्षणाधिकाऱ्यांना अधिकृत पत्र पाठवून त्वरित कारवाई करण्याचे आदेश देण्यात आले आहेत.

शिक्षण उपसंचालकांनी दिलेल्या आदेशानुसार, अतिरिक्त शिक्षकांना विनाकारण प्रलंबित न ठेवता त्यांचे जिल्हा परिषद शाळांमध्ये समायोजन करण्याची प्रक्रिया तात्काळ सुरू करावी, असे स्पष्ट करण्यात आले आहे. ही प्रक्रिया राबवताना कोणत्याही अधिनियम, शासन निर्णय (GR), परिपत्रक किंवा प्रचलित नियमांचे उल्लंघन होणार नाही, याची विशेष दक्षता घेण्याच्या सूचनाही देण्यात आल्या आहेत.

तसेच, कोणत्याही न्यायालयीन आदेशाचा भंग होणार नाही याची जबाबदारी प्रशासनावर सोपवण्यात आली असून, संबंधितांना विश्वासात घेऊन उपोषणासारखे टोकाचे आंदोलन टाळण्याचे आवाहनही पत्राद्वारे करण्यात आले आहे.

या प्रकरणाची गंभीर दखल घेत आदेशाची प्रत जिल्हा परिषदेचे मुख्य कार्यकारी अधिकारी (CEO) तसेच पुणे येथील प्राथमिक शिक्षण संचालक यांनाही पाठवण्यात आली आहे.

अल्पसंख्याक शाळांमधील अतिरिक्त शिक्षकांचा प्रश्न अनेक दिवसांपासून प्रलंबित होता. प्रशासनाच्या या निर्णयामुळे संबंधित शिक्षकांना मोठा दिलासा मिळण्याची शक्यता व्यक्त केली जात आहे. तसेच जिल्हा परिषद शाळांमधील रिक्त पदे भरण्यासही या निर्णयाचा फायदा होणार असल्याचे बोलले जात आहे.

“शिक्षकांच्या प्रश्नावर अखेर प्रशासन हलले; आता आदेशाची प्रत्यक्ष अंमलबजावणी किती वेगाने होते, याकडे सर्वांचे लक्ष लागले आहे.”