“दोन बहिणी… एकच स्वप्न, समाजसेवेची शपथ!” — सीमा आणि सायमा कुरेशी बनल्या डॉक्टर

महाराष्ट्र वाणी

मुंबई (प्रतिनिधी) दि १५ :- जिद्द, मेहनत आणि समाजसेवेची प्रामाणिक भावना असेल तर यश नक्की मिळते, याचे प्रेरणादायी उदाहरण म्हणजे मुंबईतील अब्दुल नबी कुरेशी यांच्या कन्या सीमा कुरेशी आणि सायमा कुरेशी. २०२५ च्या एमबीबीएस अंतिम परीक्षेत दोघींनीही उल्लेखनीय यश संपादन करत डॉक्टर होण्याचा मान मिळवला असून, त्यांच्या या यशामुळे कुटुंबासह संपूर्ण समाजात अभिमानाचे वातावरण निर्माण झाले आहे.

एकाच घरातील दोन बहिणींनी एकत्रितपणे डॉक्टर बनण्याचा टप्पा गाठणे ही अत्यंत अभिमानाची आणि प्रेरणादायी बाब मानली जात आहे. सीमा आणि सायमा यांनी कठोर परिश्रम, सातत्यपूर्ण अभ्यास आणि आत्मविश्वासाच्या जोरावर हे यश मिळवले. वैद्यकीय शिक्षणाच्या कठीण प्रवासात अनेक अडचणींना सामोरे जात त्यांनी आपल्या ध्येयापासून कधीही माघार घेतली नाही.

विशेष म्हणजे, डॉक्टर झाल्यानंतर केवळ मोठ्या करिअरचे स्वप्न न पाहता समाजातील गरीब आणि गरजू रुग्णांची सेवा करण्याचा संकल्प या दोन्ही बहिणींनी व्यक्त केला आहे. “डॉक्टर होणे हे केवळ व्यवसाय नसून समाजसेवेचे माध्यम आहे,” अशी भावना त्यांनी व्यक्त केली.

आजच्या काळात मुलींनी उच्च व व्यावसायिक शिक्षण घेणे ही समाजासाठी अत्यंत सकारात्मक बाब ठरत आहे. अशा परिस्थितीत सीमा आणि सायमा यांचे यश अनेक मुलींसाठी प्रेरणादायी ठरणारे आहे. त्यांच्या या यशामुळे शिक्षण, मेहनत आणि चिकाटीच्या बळावर कोणतेही स्वप्न पूर्ण करता येते, हा संदेश पुन्हा अधोरेखित झाला आहे.

कुरेशी कुटुंबावर अभिनंदनाचा वर्षाव होत असून, नातेवाईक, मित्रपरिवार आणि समाजातील विविध स्तरांतून दोन्ही बहिणींचे कौतुक केले जात आहे.

“स्वप्न मोठं असेल, तर मेहनतीलाही मर्यादा नसतात… सीमा आणि सायमा यांनी हे पुन्हा सिद्ध करून दाखवलं!”