दहावीचा निकाल घोषित; मुलींची सरशी, कोकण विभाग राज्यात अव्वल!

महाराष्ट्र वाणी

मुंबई दि ८ :- महाराष्ट्र राज्य माध्यमिक व उच्च माध्यमिक शिक्षण मंडळाने सन 2026 चा दहावी (SSC) परीक्षेचा निकाल जाहीर केला असून यंदा राज्याचा एकूण निकाल 92.02 टक्के लागला आहे. यावर्षीच्या निकालात मुलींनी पुन्हा एकदा चमकदार कामगिरी करत मुलांपेक्षा अधिक यश संपादन केले आहे.

मंडळाने दिलेल्या माहितीनुसार, परीक्षेला बसलेल्या मुलींमध्ये 94.96 टक्के विद्यार्थिनी उत्तीर्ण झाल्या आहेत, तर मुलांचा निकाल 89.56 टक्के इतका नोंदवण्यात आला आहे. त्यामुळे यंदाही मुलींनी बाजी मारल्याचे स्पष्ट झाले आहे.

राज्यातील विभागनिहाय निकालात कोकण विभागाने अव्वल स्थान पटकावले असून येथे 97.62 टक्के निकाल लागला आहे. तर सर्वात कमी निकाल छत्रपती संभाजीनगर विभागाचा लागला असून तो 88.41 टक्के इतका आहे.

यंदा राज्यभरातील पुणे, मुंबई, नाशिक, छत्रपती संभाजीनगर, नागपूर, अमरावती, कोल्हापूर आणि कोकण या नऊ विभागीय मंडळांमार्फत परीक्षा घेण्यात आली होती. एकूण 15 लाख 42 हजार 472 विद्यार्थ्यांनी परीक्षा दिली होती. त्यापैकी 14 लाख 20 हजार 486 विद्यार्थी उत्तीर्ण झाले आहेत.

मंडळाच्या माहितीनुसार, यावर्षी 6612 शाळांचा निकाल शंभर टक्के लागला आहे. तसेच विद्यार्थ्यांच्या गुणांकनासाठी ‘बेस्ट ऑफ फाईव्ह’ पद्धतीचा वापर करण्यात आला.

दरम्यान, जे विद्यार्थी अनुत्तीर्ण झाले आहेत त्यांच्यासाठी पुरवणी परीक्षेची संधी उपलब्ध करून देण्यात येणार असल्याची माहितीही मंडळाने दिली आहे. अकरावीचे शैक्षणिक वर्ग वेळेत सुरू करता यावेत यासाठी यंदा परीक्षा नियोजित वेळेपेक्षा दहा दिवस आधी घेण्यात आली होती.

विभागनिहाय निकाल पुढीलप्रमाणे :

कोकण – 97.62%

कोल्हापूर – 95.47%

मुंबई – 94.97%

पुणे – 94.24%

नाशिक – 90.53%

अमरावती – 90.50%

नागपूर – 89.07%

लातूर – 88.42%

छत्रपती संभाजीनगर – 88.41%

“दहावीच्या निकालात मुलींची पुन्हा चमक; कोकणचा दबदबा कायम!”