अंभई जिल्हा परिषद केंद्रीय प्राथमिक शाळेत उत्साहात शाळा प्रवेशोत्सव; नव्या विद्यार्थ्यांचे स्वागत

महाराष्ट्र वाणी

अंभई, दि. १५ :- जिल्हा परिषद केंद्रीय प्राथमिक शाळा, अंभई येथे शैक्षणिक वर्ष २०२६-२७ च्या प्रारंभानिमित्त ‘शाळा प्रवेशोत्सव’ उत्साहपूर्ण वातावरणात साजरा करण्यात आला. नवीन शैक्षणिक सत्राच्या पहिल्याच दिवशी विद्यार्थ्यांचे व पालकांचे स्वागत करण्यात आले तसेच प्रवेशासाठी पात्र विद्यार्थ्यांचे प्रवेश अर्ज भरून घेण्याची प्रक्रिया पार पडली.

शिक्षणाच्या मुख्य प्रवाहात अधिकाधिक विद्यार्थ्यांचा सहभाग वाढावा आणि प्रत्येक बालक शाळेत दाखल व्हावा, या उद्देशाने आयोजित करण्यात आलेल्या प्रवेशोत्सवाला पालक व ग्रामस्थांचा उत्स्फूर्त प्रतिसाद मिळाला. शाळेच्या वतीने नवागत विद्यार्थ्यांचे स्वागत करून त्यांना शिक्षणाचे महत्त्व पटवून देण्यात आले.

शाळा प्रशासनाने दिलेल्या माहितीनुसार, हा प्रवेशोत्सव ३० जून २०२६ पर्यंत सुरू राहणार असून मराठी, उर्दू तसेच सेमी इंग्रजी माध्यमासाठी नवीन प्रवेश दिले जाणार आहेत. पालकांनी आपल्या पाल्यांचा वेळेत प्रवेश घेऊन या उपक्रमाचा लाभ घ्यावा, असे आवाहन करण्यात आले आहे.

या कार्यक्रमास मराठी व उर्दू माध्यमाचे मुख्याध्यापक, शालेय व्यवस्थापन समितीचे अध्यक्ष, गावातील प्रतिष्ठित नागरिक, पालक, विद्यार्थी तसेच शिक्षकवृंद मोठ्या संख्येने उपस्थित होते. सर्वांच्या सहभागामुळे प्रवेशोत्सवाला उत्साहपूर्ण वातावरण लाभले.

शिक्षणाची गोडी वाढविण्यासाठी आणि प्रत्येक मुलाला दर्जेदार शिक्षण उपलब्ध करून देण्यासाठी शाळेच्या वतीने विविध उपक्रम राबविण्यात येणार असल्याची माहिती यावेळी देण्यात आली.

वाचा ‘महाराष्ट्र वाणी’वर आपल्या परिसरातील ताज्या घडामोडी आणि शिक्षण क्षेत्रातील विशेष बातम्या!