पदवीधर निवडणुकीतील योगदानाबद्दल हरिदास पाटील शेलार आणि अखलाख देशमुख यांचा राष्ट्रवादी भवनात सत्कार

छत्रपती संभाजीनगर (औरंगाबाद) दि २ :- मराठवाडा पदवीधर मतदारसंघाच्या नुकत्याच पार पडलेल्या निवडणुकीत महाविकास आघाडीचे उमेदवार डॉ. प्रतापसिंह वेदप्रकाश पाटील यांच्या प्रचारासाठी सिल्लोड तालुक्यात नियोजनबद्ध पद्धतीने काम करत त्यांना विभागातून मोठ्या प्रमाणात मतदान मिळवून देण्यात महत्त्वपूर्ण योगदान देणाऱ्या पदाधिकाऱ्यांचा राष्ट्रवादी भवन, छत्रपती संभाजीनगर येथे सत्कार करण्यात आला.

राष्ट्रवादी काँग्रेस पक्षाचे जिल्हाध्यक्ष पांडुरंग तांगडे पाटील यांच्या हस्ते राष्ट्रवादी किसान सेलचे जिल्हाध्यक्ष तथा सिल्लोड तालुक्यातील ज्येष्ठ नेते हरिदास पाटील शेलार यांचा विशेष सत्कार करण्यात आला. त्यांनी सिल्लोड तालुक्यात प्रचाराचे प्रभावी नियोजन करून पक्षाच्या उमेदवाराला मतदान मिळवून देण्यासाठी घेतलेल्या मेहनतीची यावेळी दखल घेण्यात आली.

तसेच, राष्ट्रवादी काँग्रेस पक्षाच्या ज्येष्ठ नागरिक सेलचे जिल्हाध्यक्ष तथा 'महाराष्ट्र वाणी न्यूज'चे संपादक अखलाख देशमुख यांचाही सोशल मीडियाच्या माध्यमातून निवडणूक प्रचार प्रभावीपणे हाताळल्याबद्दल सत्कार करण्यात आला. निवडणुकीदरम्यान सोशल मीडियावर उमेदवाराची भूमिका, प्रचाराचे मुद्दे, निवडणुकीशी संबंधित माहिती आणि पक्षाची भूमिका जनतेपर्यंत पोहोचविण्यासाठी त्यांनी केलेल्या कामाचे यावेळी कौतुक करण्यात आले.

निवडणुकीच्या काळात प्रत्यक्ष प्रचारासोबतच सोशल मीडिया हे जनसंपर्काचे प्रभावी माध्यम ठरले. कार्यकर्त्यांचे नियोजन, पदाधिकाऱ्यांचा समन्वय आणि डिजिटल माध्यमांचा योग्य वापर यामुळे प्रचाराला अधिक व्यापक स्वरूप प्राप्त झाले. या सर्वांच्या एकत्रित प्रयत्नांचे पक्षाच्या वतीने कौतुक करण्यात आले.

या सत्कार सोहळ्याप्रसंगी जिल्ह्यातील सर्व तालुक्यांचे तालुकाध्यक्ष, विविध फ्रंटल सेलचे जिल्हाध्यक्ष, जिल्ह्यातील पदाधिकारी, ज्येष्ठ नेते आणि कार्यकर्ते मोठ्या संख्येने उपस्थित होते.

निवडणुकीतील योगदानाची पक्षाने घेतलेली दखल आणि केलेला सन्मान यामुळे पदाधिकारी व कार्यकर्त्यांमध्ये उत्साहाचे वातावरण निर्माण झाले. आगामी काळातही पक्ष संघटना मजबूत करण्यासाठी आणि जनतेच्या प्रश्नांसाठी एकत्रितपणे काम करण्याचा निर्धार यावेळी व्यक्त करण्यात आला.

महाराष्ट्र वाणी | सत्यासाठी निर्भीड, जनतेसाठी समर्पित