शहरातील नेते शांत… पण अकोल्याचे आमदार साजीद पठाण धावून आले! पैठण गेटवरील पीडितांना दिला न्यायाचा शब्द

महाराष्ट्र वाणी 

छत्रपती संभाजीनगर (औरंगाबाद) दि २२ :- पैठण गेट परिसरात महानगरपालिकेने अतिक्रमणाच्या नावाखाली तब्बल १२५ गोर-गरीबांची दुकाने हटवून त्यांचा रोजगार हिरावून घेतला, त्यामुळे अनेक कुटुंबांवर उपासमारीची वेळ आली आहे. एकीकडे सरकार रोजगार निर्मितीच्या घोषणा करत असताना, दुसरीकडे अशा कारवायांमुळे सामान्य जनतेचे आयुष्य उद्ध्वस्त होत असल्याची भावना नागरिकांत आहे.

या संपूर्ण प्रकरणाची माहिती मिळताच अकोला पश्चिमचे आमदार साजिद खान पठाण दिनांक २१ रोजी तात्काळ घटनास्थळी दाखल झाले. त्यांनी भग्नावस्थेतील दुकाने पाहून पीडित नागरिकांशी संवाद साधला, त्यांचे आर्त आवाज ऐकून घेतले आणि हिवाळी अधिवेशनात हा मुद्दा ठामपणे उपस्थित करून न्याय मिळवून देण्याचे आश्वासन दिले.

यानंतर आमदार पठाण थेट महानगरपालिकेत गेले आणि उपायुक्तांची भेट घेऊन या अतिक्रमण कारवाईबद्दल जाब विचारला. तसेच पीडितांना तातडीने न्याय देण्याचे निर्देशही त्यांनी प्रशासनाला दिले.

या प्रसंगी जिल्हा शहर काँग्रेस कमिटीचे अध्यक्ष शेख युसुफ, महाराष्ट्र प्रदेश काँग्रेस कमिटीचे माजी सचिव अॅड. सय्यद अकरम, हरसूलचे माजी नगरसेवक युनूस पटेल, बाळु अवताडे, जावेद पटेल, अल्पसंख्याक काँग्रेस कमिटीचे जिल्हाध्यक्ष अनीस पटेल यांसह अनेक पदाधिकारी व कार्यकर्त्यांची मोठ्या संख्येने उपस्थिती होती.

शहरातील कोणताही राजकीय पक्ष या कारवाईवर आवाज उठवत नसताना, अकोल्याचे आमदार साजिद खान पठाण थेट पैठण गेटवर येऊन पीडित नागरिकांच्या पाठीशी उभे राहिले, ही बाब शहरात सध्या मोठ्या चर्चेचा विषय ठरली आहे.