मुकुंदवाडीत NCP शरदचंद्र पवार पक्षातर्फे संविधान दिन साजरा; बाबासाहेबांना पुष्पहार अर्पण करून अभिवादन

महाराष्ट्र वाणी 

छत्रपती संभाजीनगर(औरंगाबाद) दि २६ :- जगातील सर्वात मोठ्या लोकशाहीची पायाभरणी करणारे भारतीय संविधान, महामानव डॉ. बाबासाहेब आंबेडकर यांनी 26 नोव्हेंबर 1949 रोजी देशाला अर्पण केले. त्या ऐतिहासिक दिवसाच्या स्मरणार्थ दरवर्षी ‘संविधान दिन’ देशभरात उत्साहात साजरा केला जातो. त्यानिमित्ताने संजयनगर, मुकुंदवाडी येथे डॉ. बाबासाहेब आंबेडकर यांच्या पुतळ्याला पुष्पहार अर्पण करून आदरांजली वाहण्यात आली.

या कार्यक्रमात राष्ट्रवादी काँग्रेस शरदचंद्र पवार पक्षाचे जिलाध्यक्ष पाडुरंग तांगडे पाटील, शहराध्यक्ष खाजा भाई, पक्षाचे पदाधिकारी तसेच स्थानिक नागरिक आणि कार्यकर्ते मोठ्या संख्येने उपस्थित होते. डॉ. आंबेडकरांच्या पुतळ्यास अभिवादन करत संविधानाने दिलेल्या स्वातंत्र्य, समानता आणि बंधुता या मूल्यांची जपणूक करण्याचा संकल्प उपस्थितांनी व्यक्त केला.

संविधान दिनानिमित्त आयोजित कार्यक्रमात सामाजिक एकात्मता, लोकशाही मूल्यांचे संवर्धन आणि नव्या पिढीपर्यंत संविधानाचा संदेश पोहोचवण्यावर भर देण्यात आला. उपस्थित मान्यवरांनी डॉ. आंबेडकरांच्या विचारांचे स्मरण करून भारतीय संविधान हे देशाची सर्वात मोठी ताकद असल्याचे सांगितले.

कार्यक्रमाचे आयोजन स्थानिक पदाधिकारी व नागरिकांनी संयुक्तरीत्या केले. परिसरात संविधान दिनाचा संदेश देणारे फलक आणि घोषवाक्यांनी माहोल भारावून गेला होता.