दशसूत्रीच्या प्रभावी अंमलबजावणीसाठी पालक सभेत पालकांची उपस्थिती महत्त्वाची- जिल्हाधिकारी दिलीप स्वामी

महाराष्ट्र वाणी 

 छत्रपती संभाजीनगर(औरंगाबाद)दि.१८ :- जिल्ह्यामध्ये शिक्षण वैविध्यपूर्ण आणि गुणवत्तापूर्ण बदल घडवणाऱ्या दशसूत्री उपक्रमाची अंमलबजावणी जिल्हाधिकारी दिलीप स्वामी यांच्या संकल्पनेतून करण्यात येत आहे. या मध्ये विद्यार्थ्यांच्या सर्वांगीण विकासासाठी पालकांना सामावून घेणे महत्वाचे आहे.पालक सभेत जास्तीत जास्त पालकांचे उपस्थिती राहील यासाठी शिक्षण विभागातील केंद्रप्रमुख, शिक्षण विस्तार अधिकारी, तालुका शिक्षण अधिकाऱ्यांनी प्रयत्न करावेत ,असे निर्देश जिल्हाधिकारी दिलीप स्वामी यांनी आज केंद्रप्रमुखांच्या आढावा बैठकीत दिले. या बैठकीस जिल्हा परिषदेचे मुख्य कार्यकारी अधिकारी श्री अंकित ,शिक्षण अधिकारी अश्विनी लाटकर, उपशिक्षणाधिकारी गीता तांदळे,जिल्ह्यातील सर्व केंद्र प्रमुख, शिक्षण विस्तार अधिकारी उपस्थित होते . जिल्हाधिकारी कार्यालयात नियोजन सभागृहात केंद्रप्रमुखांच्या बैठकीचे आयोजन करण्यात आले होते. विद्यार्थ्यांचे आरोग्य, शिक्षण स्वच्छता, व सर्वांगीण विकासाबरोबरच तंत्र स्नेही, कौशल्य अंगीकार करण्यासाठी दशसूत्री या उपक्रमाचे अंमलबजावणी शाळा महाविद्यालयामध्ये करण्यात येत आहे .या उपक्रमाची माहिती पालकांना देऊन त्यांचा सक्रिय सहभाग घेतल्याशिवाय या उपक्रमाची यशस्वी फलनिष्पत्ती शक्य होणार नाही .यासाठी शिक्षक,मुख्याध्यापक यांनी पालक सभेमध्ये जास्तीत जास्त विद्यार्थ्यांचे पालक उपस्थित राहतील यासाठीचे प्रयत्न करावेत. शिक्षण विभागात नावीन्यपूर्ण काम करणाऱ्या शिक्षकांचा व त्या शाळेचा सन्मान करण्यात येऊन हा प्रयोग इतर शाळेत लागू करण्यासाठी शिक्षकांनी सक्रिय सहभाग घ्यावा, जिल्ह्यातील तालुकास्तरावर एक परिपाठ कक्ष स्थापन करण्यात यावा जेणेकरून मार्गदर्शक अशा उपक्रमाची माहिती आणि अंमलबजावणीसाठी या उपयोग होईल असे जिल्हाधिकारी यांनी सांगितले. जिल्हा परिषदेचे मुख्य कार्यकारी अधिकारी श्री अंकित म्हणाले की पालक सभेमध्ये जास्तीत जास्त पालकांचा सहभाग होण्यासाठी विद्यार्थ्यांच्या सोबत द्यावे. पालकांना पत्र शाळेच्या मार्फत देण्यात यावे . जास्तीत जास्त पालक उपस्थित राहतील यासाठी प्रत्येक शिक्षकांनी पालकांनाही सूचित करून उपस्थित राहण्याच्या आवाहन करावे. केंद्रप्रमुखांनी क्षेत्रभेट करून जिल्हा परिषद शाळेच्या भेटीचे अहवाल केंद्रप्रमुख आणि गटशिक्षण अधिकाऱ्यांनी सादर करावेत. शाळेतील वातावरण निरोगी आणि उत्साही व्हावे यासाठी शैक्षणिक साहित्य बरोबरच शाळेच्या वर्ग खोल्या ही रंगीबेरंगी आणि सुसज्ज ठेवण्यासाठी शिक्षकाबरोबरच नागरिकांचा सहभाग,मदत घ्यावी. शाळेला होणाऱ्या स्वच्छ पिण्याच्या पाण्याचा पाणीपुरवठ्याच्या बाबत योग्य ती खबरदारी घ्यावी. शाळाबाह्य विद्यार्थ्यांचे सर्वेक्षण प्रभावीपणे करण्याचेही निर्देश मुख्य कार्यकारी अधिकारी श्री अंकित यांनी दिले. दिव्यांग विद्यार्थ्यांच्या नोंदीचा अहवाल व त्यांनी घेतलेल्या लाभाची माहिती जिल्हास्तरावर सादर करण्याचेही संबंधित केंद्रप्रमुख आणि शिक्षण अधिकारी यांना निर्देशित करण्यात आले. जिल्हाधिकारी स्वामी म्हणाले की पालक सभेबरोबरच तालुका स्तरावर गुणवत्ता कक्ष स्थापन करण्यासाठी सक्रिय सहभाग घेतलेल्या व विविध नाविन्यपूर्ण उपक्रमाची अंमलबजावणी करणाऱ्या शिक्षकांचा सहभाग या कक्षामध्ये करण्यात यावा. शिक्षण परिषदेच्या माध्यमातून शिक्षकांच्या विविध विषयावर संवाद आणि समन्वय, नियोजन करण्याची चर्चा करण्याचेही यावेळी आवाहन करण्यात आले. जिल्ह्यातील जिल्हा परिषदेच्या सर्व शाळांमध्ये दिनांक 27नोव्हेंबर ते 29 नोव्हेंबर 2025 या तीन दिवसांमध्ये आरोग्य व विविध शासकीय विभागाच्या अधिकारी, कर्मचाऱ्यांच्या भेटीबरोबरच आरोग्य विषयक व्याख्यानाचे आयोजन करण्यात यावे . विद्यार्थ्यांना आरोग्याची काळजीकशी घ्यावी . आहार, याविषयी मार्गदर्शनही, आरोग्य विभागामार्फत उपलब्ध करून देण्यात येणार असल्याचे त्यांनी सांगितले.