उर्दु हटवून सौहार्द धोक्यात!’ – सीपीएसएन स्टेशन प्रकरणावर SDPIचा रेल्वेला १० दिवसांचा अल्टिमेटम

महाराष्ट्र वाणी 

छत्रपति संभाजीनगर(औरंगाबाद), दि. २५ :- 

सीपीएसएन रेल्वे स्थानकाच्या नामफलकांवरून उर्दू भाषा हटवण्यात आल्याच्या निषेधार्थ सोशल डेमोक्रेटिक पार्टी ऑफ इंडिया (SDPI) ने आज रेल्वे प्रशासनावर जोरदार दबाव आणला. दक्षिण मध्य रेल्वेचे महाव्यवस्थापक, नांदेड विभागाचे डीआरएम व स्थानिक स्टेशनप्रमुख यांना अधिकृत पत्र देत, उर्दू नाव तात्काळ पुन्हा लावण्याची मागणी करण्यात आली.

SDPIच्या म्हणण्यानुसार, स्थानकावरील उर्दू लिपी राजकीय दबावाखाली काढून टाकण्यात आली असून हा प्रकार —

🔹 भारतीय संविधानाच्या भावनेला

🔹 रेल्वे बोर्डाच्या बहुभाषिक धोरणाला (पत्र क्र. २०१६/TG-IV/10/Name Boards, दि. २७.०४.२०१७)

🔹 आणि सर्वोच्च न्यायालयाच्या निर्णयांना

थेट विरोध करणारा आहे.

संविधानाच्या आठव्या परिशिष्टातील अधिकृत भाषा असलेल्या उर्दूचे नामफलकांवरून गायब होणे हे स्थानिकांच्या अधिकारांवर गदा आणणारे असल्याची टीका पक्षाने केली. “उर्दू काढणे म्हणजे संवैधानिक अधिकारांचे उल्लंघन आणि सामाजिक सलोखा धोक्यात घालण्याचा प्रयत्न,” असा इशारा SDPIने दिला.

१० दिवसांचा अल्टिमेटम!

रेल्वे प्रशासनाने १० दिवसांत उर्दूतील नामफलक पुन्हा लावावेत, अन्यथा पक्ष शांततापूर्ण आंदोलन व कायदेशीर लढाई उभारेल, असा इशारा SDPIने दिला आहे.

या निवेदनावेळी जिल्हाध्यक्ष समीर शाह (इंजिनियर), उपाध्यक्ष डॉ. इमरान नजीर शेख, जिल्हा महासचिव मोहसीन खान, अब्दुल अलीम शेख, अशरफ पठाण, आरेफ शाह, उमर मिर्झा, मुश्ताक शेख, साजेद पटेल, तसेच पूर्व विधानसभाध्यक्ष हाफीज अबुजर पटेल यांच्यासह अनेक पदाधिकारी मोठ्या संख्येने उपस्थित होते.