💥 ‘नशेचा काळाबाजार उध्वस्त!’ – 190 कफ सिरपच्या बाटल्यांसह तिघे जेरबंद

महाराष्ट्र वाणी

छत्रपती संभाजीनगर(औरंगाबाद), दि. ८ :- शहरात बेकायदेशीररीत्या गुंगीकारक कफ सिरपची विक्री करणाऱ्या टोळीवर गुन्हे शाखेने मोठी कारवाई करत तीन आरोपींना अटक केली आहे. या कारवाईत तब्बल 190 कफ सिरपच्या बाटल्या आणि मोबाईल असा एकूण 96 हजार रुपयांचा मुद्देमाल जप्त करण्यात आला.

गुन्हे शाखेला 6 एप्रिल रोजी गुप्त बातमीदारामार्फत माहिती मिळाली होती की, बीड बायपास येथील अबरार कॉलनी परिसरात काही जण नशेसाठी वापरल्या जाणाऱ्या कफ सिरपची बेकायदेशीर साठवणूक करून विक्री करत आहेत. माहितीची खात्री करून पोलिसांनी तात्काळ छापा टाकला.

या छाप्यात शेख आवेज शेख नवाब, सय्यद अखिल सय्यद काजी हुसैनी आणि शेख अरबाज शेख फिरोज या तिघांना रंगेहाथ पकडण्यात आले. तर या प्रकरणातील मुख्य पुरवठादार अदनान कापडिया (रा. गुजरात) हा अद्याप फरार असून त्याचा शोध सुरू आहे.

पोलिसांनी जप्त केलेल्या कफ सिरपमध्ये कोडीनयुक्त औषधांचा समावेश असून, डॉक्टरांच्या सल्ल्याशिवाय त्याचा वापर केल्यास ते मानवी आरोग्यास घातक ठरते. आरोपी हे आर्थिक फायद्यासाठी अशा प्रकारची बेकायदेशीर विक्री करत असल्याचे तपासात उघड झाले आहे.

सदर कारवाई पोलीस आयुक्त प्रविण पवार, पोलीस उपायुक्त शर्मिष्ठा घारगे आणि सहाय्यक पोलीस आयुक्त अशोक राजपूत यांच्या मार्गदर्शनाखाली गुन्हे शाखेच्या पथकाने केली.

शहरात अंमली पदार्थांविरोधात पोलीसांची विशेष मोहीम सुरू असून, नागरिकांनी कुठेही अशा प्रकारची बेकायदेशीर विक्री होत असल्यास त्वरित पोलीसांना माहिती द्यावी, असे आवाहन करण्यात आले आहे.

👉 नशेच्या विळख्यातून शहराला वाचवण्यासाठी पोलीसांचा हा धडाका — पुढची कारवाई आणखी मोठी असणार का?