मोटारसायकल चोरीला लगाम! जवाहरनगर पोलिसांची धडक कारवाई; तीन चोरट्यांकडून १४ मोटारसायकली जप्त

महाराष्ट्र वाणी 

छत्रपती संभाजीनगर(औरंगाबाद) दि २७ :- शहरातील वाढत्या मोटारसायकल चोरी प्रकरणांवर जवाहरनगर पोलिसांनी मोठी कारवाई करत तीन चोरट्यांच्या मुसक्या आवळल्या आहेत. त्यांच्या ताब्यातून बुलेट, युनिकॉर्न, बर्गमन यांसह एकूण १४ मोटारसायकली असा तब्बल ₹8,25,000/- किंमतीचा मुद्देमाल जप्त करण्यात आला आहे.

घटना अशी –

दिनांक 22 नोव्हेंबर रोजी पेट्रोलिंगदरम्यान पोलीस अंमलदार मारोती गोरे यांना गुप्त माहिती मिळाली की फोस्टर कॉलेज परिसरात एक इसम चोरीची मोटारसायकल घेऊन येणार आहे. ही माहिती तात्काळ पोलीस निरीक्षक सचिन कुंभार यांना देण्यात आली. त्यांच्या मार्गदर्शनाखाली पोलीस पथकाने शिवाजीनगर परिसरात सापळा रचला.

दरम्यान, विनानंबर स्कूटीवरून दोन संशयित युवक जाताना दिसले. थांबण्याचा इशारा दिल्यावर त्यांनी पळ काढला. पोलिसांनी पाठलाग करून दोघांना पकडले. चौकशीत त्यांची नावे समर्थ विनोद काळे (२२) आणि पवन परमेश्वर चौधरी (१८) अशी समोर आली. स्कूटीबाबत विचारले असता त्यांनी उडवाउडवीची उत्तरे दिली.

पोस्टेवर आणून अधिक तपास केला असता त्यांनी ही स्कूटी आपल्या साथीदारासह चोरी केल्याची कबुली दिली. त्यानंतर तिसरा आरोपी सोहेल बेग (२७) याला ए.पी.आय कॉर्नर परिसरातून ताब्यात घेण्यात आले.

पोलीस कोठडीत कबुली – १४ मोटारसायकली चोरी!

दिनांक 23 नोव्हेंबर रोजी आरोपींना न्यायालयात हजर केले असता २ दिवसांची पोलीस कोठडी मिळाली. चौकशीत तिघांनी छत्रपती संभाजीनगर शहरातील विविध भागांमधून १४ मोटारसायकली चोरी केल्याची कबुली दिली. त्यातील काही मोटारसायकली म्हाडा कॉलनी, मयूरबन कॉलनीजवळील झुडपात लपवून ठेवण्यात आल्या होत्या, तर काही गजानन वाईन शॉपसमोर विक्रीसाठी उभ्या केल्या होत्या.

जप्त केलेला मुद्देमाल –

बुलेट – १

होंडा युनिकॉन – १

यामाहा – १

सुझुकी बर्गमन – २

हिरो ड्युट स्कुटी – २

होंडा अॅक्टीवा – ७

एकूण : १४ मोटारसायकली (किंमत ₹8,25,000/-)

या कारवाईत जवाहरनगर, क्रांतीचौक, सिडको, सिटीचौक, उस्मानपूरा, वेदांतनगर, MIDC वाळुज, बेगमपुरा, छावणी या हद्दींतील मोटारसायकल चोरीचे गुन्हे उघडकीस आणण्यात पोलीस यशस्वी झाले.

प्रशंसनीय कामगिरी –

ही कारवाई पोलीस आयुक्त विरेंद्र मिश्र, उपआयुक्त प्रशांत स्वामी, सहाय्यक पोलीस आयुक्त मनीष कल्याणकर, आणि वरिष्ठ पोलीस निरीक्षक सचिन कुंभार यांच्या मार्गदर्शनाखाली करण्यात आली. तपासी अमलदार पोह. इंदलसिंग महेर तसेच पोह. अनिल भाले, पोअं. मारोती गोरे, संदीप बिलारी, प्रविण कापरे, मंगेश घुगे, सतीश सानप आणि विजय सुरे यांनी उत्कृष्ट कामगिरी बजावली.

⏺ महाराष्ट्र वाणी — बातम्या बोलक्या, तथ्यांसह!