“राजकारणात भूकंप! माजी उपमहापौर राजू शिंदे करणार भाजपात घरवापसी; फडणवीसांच्या उपस्थितीत भव्य प्रवेश सोहळा”

महाराष्ट्र वाणी न्युज 

छत्रपती संभाजीनगर( औरेगाबाद) दि १५ :- छत्रपती संभाजीनगरच्या राजकीय वातावारणाला मोठी कलाटणी देणारा निर्णय माजी उपमहापौर राजू शिंदे यांनी घेतला आहे. काही वर्षांच्या राजकीय वळणानंतर ते पुन्हा एकदा आपल्या जुन्या पक्षात म्हणजेच भारतीय जनता पक्षात प्रवेश करणार आहेत. विशेष म्हणजे मुख्यमंत्री देवेंद्र फडणवीस यांच्या उपस्थितीत १६ नोव्हेंबर रोजी हा प्रवेश सोहळा पार पडणार आहे.

राजू शिंदे हे शहरातील प्रभावी राजकीय व्यक्तिमत्व मानले जाते. भाजपमधून राजकारणाची सुरुवात करत त्यांनी उपमहापौरपदाची जबाबदारीही यशस्वीपणे निभावली होती. नंतर राजकीय समीकरणे बदलताना त्यांनी उद्धव ठाकरे यांच्या शिवसेनेत प्रवेश केला. 2024 च्या विधानसभा निवडणुकीत त्यांना पश्चिम मतदारसंघातून उमेदवारी देण्यात आली आणि त्यांनी मंत्री संजय शिरसाठ यांच्या विरोधात चांगलेच मताधिक्य मिळवत लढत दिली होती.

पराभवानंतर त्यांनी ठाकरे गटातील काही ज्येष्ठ नेत्यांवर प्रतिस्पर्ध्याला मदत केल्याचे आरोप करत पक्षाला दूर केले. त्यावेळी त्यांच्या प्रवेशामुळे भाजप आणि शिवसेना शिंदे गटात प्रचंड खळबळ माजली होती. अनेक वरिष्ठ नेत्यांनी त्यांना रोखण्याचे प्रयत्न केले होते, मात्र शिंदे यांनी पक्ष बदलण्याचा निर्णय कायम ठेवला.

आता पुन्हा एकदा ते भाजपत परतण्याचा निर्णय घेतल्याने स्थानिक राजकारणात नवे समीकरण निर्माण होणार आहे. मुख्यमंत्री फडणवीस संभाजीनगर दौऱ्यावर असताना नव्या भाजपा कार्यालयाच्या उद्घाटन सोहळा होणार आहे. त्यानंतर हा पक्ष प्रवेश सोहळा होणार आहे.

राजू शिंदे यांच्या पुनर्प्रवेशामुळे आगामी नगरपालिका, महानगरपालिका आणि इतर स्थानिक स्वराज्य संस्थांच्या निवडणुकांमध्ये भाजप-महायुतीची ताकद वाढणार असल्याचे मानले जात आहे. पक्षातही या घरवापसीकडे ‘महत्त्वाची भर’ म्हणून पाहिले जात आहे.

राजकारणातील नवे वारे… संभाजीनगरची समीकरणे पुन्हा हलणारच!