गाजियाबादमध्ये महाराष्ट्राचा मान उंचावला : अकोले तालुक्याच्या फिज़ा सैय्यदला फेडरेशन कपमध्ये कांस्यपदक!
महाराष्ट्र वाणी न्युज
छत्रपती संभाजीनगर ( औरंगाबाद) दि १९ :- उत्तर प्रदेशातील गाजियाबाद येथे पार पडलेल्या १५व्या फेडरेशन कप सीनियर नॅशनल सॉफ्टबॉल चॅम्पियनशिप २०२५-२६ मध्ये महाराष्ट्राच्या फिज़ा सैय्यद हिने उल्लेखनीय कामगिरी करत कांस्यपदक पटकावले.
अहमदनगर जिल्ह्यातील अकोले तालुक्यातील कन्या असलेल्या फिजा हिने राज्य संघाकडून खेळताना उत्कृष्ट खेळ कौशल्य दाखवत महाराष्ट्राचा नावलौकिक संपूर्ण देशभरात उजळविला. तिच्या या यशामुळे अकोले तालुक्यासह संपूर्ण महाराष्ट्रात अभिमानाची भावना व्यक्त होत आहे.
कष्ट, जिद्द आणि चिकाटीचा पराक्रम
फिजा सैय्यद हिने गेल्या काही वर्षांत सातत्याने मेहनत घेत आपली कामगिरी अधिकाधिक सक्षम केली आहे. शिस्तबद्ध सराव, उत्तम फिटनेस आणि संघभावना याच्या जोरावर तिने राष्ट्रीय स्तरावरील या प्रतिष्ठेच्या स्पर्धेत आपले स्थान पक्के केले. तिच्या या प्रयत्नांमुळे महाराष्ट्राचा संघ उपांत्य फेरीत पोहोचला आणि अखेर कांस्यपदक जिंकण्यात यशस्वी झाला.
मुख्यमंत्री व जलसंपदा मंत्र्यांकडून अभिनंदन
फिजाच्या या ऐतिहासिक यशाबद्दल राज्याचे मुख्यमंत्री देवेंद्र फडणवीस तसेच जलसंपदा मंत्री डॉ. राधाकृष्ण विखे पाटील यांनी हार्दिक शुभेच्छा दिल्या आहेत. ग्रामीण भागातील मुलीने राष्ट्रीय स्तरावर पदक जिंकून महाराष्ट्राचा सन्मान वाढविला आहे, असे गौरवोद्गार त्यांनी काढले.
कुटुंब व तालुक्याचा अभिमान
फिज़ाच्या या यशामुळे तिच्या कुटुंबात आनंदाचे वातावरण असून, गावातील नागरिक, शिक्षक आणि क्रीडाप्रेमींनी तिचे मनःपूर्वक अभिनंदन केले आहे. अकोले तालुक्यातील कन्येने राष्ट्रीय पातळीवर गवसलेले हे यश संपूर्ण प्रदेशासाठी प्रेरणादायी ठरणारे आहे.
प्रेरणा ठरणारे यश
फिज़ाच्या मेहनती आणि चिकाटीमुळे अनेक तरुण खेळाडूंना नवी ऊर्जा मिळाली आहे. तिच्या या कामगिरीमुळे राज्यातील सॉफ्टबॉल खेळाला चालना मिळेल, असा विश्वास क्रीडावर्तुळातून व्यक्त केला जात आहे.
👉 महाराष्ट्रवाणी तर्फे फिजा सैय्यदचे मनःपूर्वक अभिनंदन!