शेतकऱ्याची मुलगी ठरली राष्ट्रीय नेमबाज – खासदार डॉ. कल्याण काळे यांनी दिला भक्कम आधार

महाराष्ट्र वाणी न्युज 

बदनापूर (प्रतिनिधी) दि २० :- बदनापूर तालुक्यातील माळेगाव या छोट्या गावातून राष्ट्रीय स्तरावर आपली ओळख निर्माण करणारी मोहिनी संजय कातुरे ही तरुणी आज संघर्षातून यशाकडे झेपावणाऱ्या मुलींचं प्रतीक ठरली आहे. शेतकरी कुटुंबातील साध्या परिस्थितीत वाढलेली मोहिनी आज राष्ट्रीय नेमबाज (National Shooter) म्हणून झळकत आहे.

नेमबाजीच्या खेळासाठी लागणारे साहित्य महाग असल्याने तिच्या प्रगतीपुढे आर्थिक अडचणींचे मोठे आव्हान उभे होते. सरावासाठी आवश्यक रायफल, नेमबाजीचा किटसह अन्य साहित्य नसल्याने तिच्या सरावावर मर्यादा येत होत्या. परंतु तिच्या जिद्दीची दखल घेत खासदार डॉ. कल्याण काळे यांच्या कार्यालयाने पुढाकार घेत मोहिनीला आवश्‍यक ती आर्थिक मदत उपलब्ध करून दिली.

आज मोहिनीने नेमबाजीसाठी लागणारे साहित्य खरेदी करून खासदार डॉ. कल्याण काळे यांच्या कार्यालयाला भेट दिली आणि त्यांचे आभार मानले. शेतकरी कुटुंबातील मुलगी असूनही राष्ट्रीय स्तरावर उभं राहण्याचं धाडस करणारी मोहिनी ही ग्रामीण भागातील तरुणांसाठी प्रेरणादायी ठरली आहे.

या वेळी खासदार डॉ. कल्याण काळे म्हणाले,

> "गाव-गाड्यातील मुलींमध्ये कितीही प्रतिभा असली तरी संधींच्या अभावामुळे ती दडून राहते. मोहिनीने जिद्द, मेहनत आणि चिकाटीच्या जोरावर नेमबाजीसारख्या खेळात आपलं कौशल्य सिद्ध केलं आहे. तिच्या पुढील वाटचालीसाठी माझ्या शुभेच्छा आहेत."

मोहिनीनेही आपल्या भावना व्यक्त करताना सांगितले की

 "स्वप्नं मोठी असावी, पण ती पूर्ण करण्यासाठी कोणी तरी हात द्यायला हवा. मला तो हात डॉ. कल्याण काळे सरांनी दिला."

जीवनातील संघर्षाला न जुमानता स्वप्नांचा पाठलाग करणाऱ्या मोहिनी कातुरेच्या पुढील यशस्वी वाटचालीस शुभेच्छांचा वर्षाव होत आहे.

👉 "असंख्य अडचणींना छेद देत स्वतःचा मार्ग तयार करणाऱ्या मोहिनीचं पुढचं लक्ष्य – आंतरराष्ट्रीय स्पर्धा!"