“ शहरात नवं गठबंधन मैदानात – फैसल खान यांच्या नेतृत्वाखाली ‘शहर विकास आघाडी’ची घोषणा!”

महाराष्ट्र वाणी न्युज 

छत्रपती संभाजीनगर( औरंगाबाद) दि १२ :- येणाऱ्या नगरपरिषद, नगरपालिका, नगरपंचायत, जिल्हा परिषद आणि महानगरपालिका निवडणुकांच्या पार्श्वभूमीवर आज छत्रपती संभाजीनगरात एक महत्त्वपूर्ण राजकीय घडामोड घडली आहे. विविध पक्ष, संघटना आणि सामाजिक चळवळींनी एकत्र येऊन “शहर विकास आघाडी” या नव्या आघाडीची स्थापना केली आहे.

या आघाडीचं नेतृत्व फैसल खान यांच्या हातात देण्यात आलं असून, जिल्ह्यातील सर्व स्थानिक स्वराज्य संस्थांच्या निवडणुकांमध्ये ही आघाडी आपले उमेदवार उतरवणार असल्याची घोषणा करण्यात आली आहे.

आघाडीत सहभागी असलेले प्रमुख पक्ष व संघटना :

राष्ट्रीय जनता दल (RJD), बहुजन मुक्ती पार्टी, राष्ट्रीय मुस्लिम मोर्चा, तेहरिक-ए-खुदादात, आज़ाद स्वाभिमानी सेना, भ्रष्टाचार विरोधी समिती, अतार बारादरी संघटन, सत्यवादी रिपब्लिकन पॉवर (SRP), लोकशाही विचार आंदोलन, आवाज संघटन, जनजीवन संघटन, राष्ट्रीय टायगर सेना, मराठवाडा खिदमत संघटन आणि OBC.AT पार्टी या सर्व संघटनांनी या आघाडीत सहभाग घेतला आहे.

या गटबंधनाचं मुख्य उद्दिष्ट – “सामान्य नागरिकांना न्याय मिळवून देणं, पारदर्शक आणि जवाबदार प्रशासन उभारणं” हे असल्याचं फैसल खान यांनी सांगितलं. त्यांनी पुढे म्हटलं की, “छत्रपती संभाजीनगरसह मराठवाड्यातील सर्व स्थानिक स्वराज्य संस्थांमध्ये आम्ही पर्याय म्हणून उभे राहणार आहोत. राजकारण म्हणजे सत्तेसाठीची स्पर्धा नाही, तर लोकांच्या प्रश्नांची सोडवणूक हीच खरी सेवा आहे.”

आघाडीच्या स्थापनेनंतर राजकीय वर्तुळात चांगलीच खळबळ माजली आहे. पारंपरिक पक्षांच्या उमेदवारांसाठी हा नवा गटबंध “कठीण आव्हान” ठरू शकतो, अशी चर्चा शहरात सुरू आहे.

🔸 शहर विकास आघाडीचा नारा: “जनतेचा विकास – शहराचा अभिमान!”

🔸 नेतृत्व: फैसल खान

🔸 लक्ष्य: जिल्ह्यातील सर्व स्थानिक स्वराज्य संस्थांच्या निवडणुका

“नव्या आघाडीच्या आगमनाने संभाजीनगरच्या राजकारणात नवी समीकरणं निर्माण होणार हे निश्चित!”